जळगाव । शहरातील कालिका माता मंदिर परिसरातील एचडीएफसी (HDFC) बँकेबाहेर भरदिवसा झालेल्या १ लाख रुपयांच्या धाडसी चोरीचा छडा शनिपेठ पोलिसांनी अवघ्या काही तासांत लावला आहे. पोलिसांनी अत्यंत शिताफीने तपास करत एका संशयिताला अटक केली असून, त्याच्याकडून चोरीस गेलेली संपूर्ण १ लाख रुपयांची रोकड आणि गुन्ह्यात वापरलेली इलेक्ट्रिक स्कूटर जप्त केली आहे. सीसीटीव्ही फुटेज, तांत्रिक विश्लेषण आणि गुप्त माहितीच्या अचूक वापरामुळे पोलिसांना हे यश आले.
नेमकी घटना काय घडली?
१३ जुलै रोजी दुपारी ३:३० ते ४:४० वाजेदरम्यान फिर्यादी अबरार अली इरफान अली चौधरी (वय २६, रा. लक्ष्मीनगर, मेहरूण, जळगाव) हे काही कामानिमित्त कालिका माता मंदिर चौकातील एचडीएफसी बँकेपाशी आले होते. त्यांनी आपली मोटारसायकल तिथे पार्क केली आणि ते जवळच पाणीपुरी खात उभे राहिले. हीच संधी साधून अज्ञात चोरट्याने त्यांच्या मोटारसायकलच्या डिक्कीत ठेवलेली १ लाख रुपयांची रोख रक्कम अत्यंत चलाखीने लांबवली. डिक्कीतून पैसे गायब झाल्याचे लक्षात येताच अबरार अली यांनी तातडीने शनिपेठ पोलीस ठाणे गाठून तक्रार दिली. याप्रकरणी पोलिसांनी भारतीय न्याय संहिता (BNS) २०२३ च्या कलम ३०३(२) अन्वये गुन्हा दाखल केला.
असा लागला चोराचा माग!
बँकेबाहेर भरदिवसा १ लाख रुपयांची चोरी झाल्याने गुन्ह्याचे गांभीर्य ओळखून पोलीस अधीक्षक श्रीकांत धिवरे यांच्या मार्गदर्शनाखाली शनिपेठ पोलीस ठाण्याचे पोलीस निरीक्षक विशाल जयस्वाल यांनी तात्काळ तपासाची चक्रे फिरवली.सीसीटीव्ही फुटेज ठरले गेमचेंजर: पोलिसांनी घटनास्थळ आणि परिसरातील अनेक सीसीटीव्ही कॅमेऱ्यांचे फुटेज बारकाईने तपासले. तांत्रिक विश्लेषण आणि गुप्त बातमीदारांनी दिलेल्या खात्रीशीर माहितीच्या आधारे पोलिसांनी रवि जगदीश प्रजापत (वय ३६, रा. प्रजापत नगर, मामुराबाद रोड, जळगाव) याला संशयावरून ताब्यात घेतले. पोलिसांनी त्याची कसून चौकशी केली असता, सुरुवातीला उडवाउडवीची उत्तरे देणाऱ्या रवि प्रजापत याने अखेर गुन्ह्याची कबुली दिली.
त्याच्याकडून चोरी झालेली १,००,००० रुपयाची रक्कम जप्त केली आहे.
Discussion about this post