जळगाव । प्रलंबित वनहक्क दावे तातडीने निकाली काढण्याच्या मागणीसाठी जळगाव जिल्हाधिकारी कार्यालयाबाहेर सुरु असलेले आदिवासी बांधवांचे आंदोलन तिसऱ्या दिवशी अधिक तीव्र झाले आहे. प्रशासनाकडून अद्याप कोणतीही सकारात्मक चर्चा अथवा ठोस तोडगा न निघाल्याने आंदोलक संतप्त झाले असून, आज सकाळी त्यांनी जिल्हाधिकारी कार्यालयाच्या मुख्य प्रवेशद्वारावरच ठिय्या मांडत कार्यालयाची पूर्णपणे नाकेबंदी केली.
गेल्या तीन दिवसांपासून जिल्हाधिकारी कार्यालयासमोर आदिवासी बांधवांचे शांततेत आंदोलन सुरू होते. मात्र, निवेदने आणि आंदोलनानंतरही प्रशासनाने दुर्लक्ष केल्याचा आरोप करत आंदोलकांनी आज थेट आक्रमक पवित्रा घेतला. जिल्हाधिकारी, वरिष्ठ अधिकारी तसेच कोणत्याही कर्मचाऱ्याला कार्यालयात प्रवेश करू न देण्याची ठाम भूमिका आंदोलकांनी घेतली. प्रवेशद्वारावरच आंदोलकांनी ठाम ठाण मांडल्याने अधिकारी व कर्मचाऱ्यांना बाहेरच ताटकळत उभे राहावे लागले.
या अचानक उद्भवलेल्या परिस्थितीमुळे जिल्हाधिकारी कार्यालय परिसरात मोठी धावपळ उडाली असून काही काळ तणावाचे वातावरण निर्माण झाले. खबरदारीचा उपाय म्हणून घटनास्थळी चोख पोलीस बंदोबस्त तैनात करण्यात आला आहे. “जोपर्यंत प्रलंबित वनहक्कांचे दावे प्रत्यक्ष निकाली काढण्याचे लेखी आश्वासन मिळत नाही, तोपर्यंत प्रवेशद्वार सोडणार नाही,” असा इशारा आंदोलक नेत्यांनी दिला आहे. आता या संवेदनशील विषयावर जिल्हा प्रशासन नेमकी काय भूमिका घेते आणि हा तिढा कसा सोडवणार, याकडे संपूर्ण जिल्ह्याचे लक्ष लागले आहे.
Discussion about this post