भारतीय अंतराळ संशोधन संस्थेत नोकरीची मोठी संधी; 175 जागांसाठी भरती, पात्रता काय?

भारतीय अंतराळ संशोधन संस्थेत (ISRO) नोकरीच्या शोधात असलेल्या इंजिनिअरिंग पदवीधरांसाठी मोठी संधी उपलब्ध झाली आहे. संस्थेच्या अंतर्गत सायंटिस्ट/इंजिनिअर ‘SC’ पदांच्या एकूण 175 जागांसाठी भरती प्रक्रिया राबविण्यात येत आहे. इलेक्ट्रॉनिक्स, मेकॅनिकल आणि कॉम्प्युटर सायन्स शाखेतील पात्र उमेदवारांना या भरतीसाठी अर्ज करता येणार आहे.

या भरतीमध्ये सायंटिस्ट/इंजिनिअर ‘SC’ (इलेक्ट्रॉनिक्स) 99, मेकॅनिकल 52 आणि कॉम्प्युटर सायन्सच्या 21 जागा आहेत. याशिवाय PRL अंतर्गत इलेक्ट्रॉनिक्स, मेकॅनिकल आणि कॉम्प्युटर सायन्स प्रत्येकी एका जागेसाठी भरती होणार आहे.

शैक्षणिक पात्रता

संबंधित पदासाठी उमेदवाराकडे B.E./B.Tech पदवीमध्ये किमान 65 टक्के गुण असणे आवश्यक आहे. इलेक्ट्रॉनिक्स पदासाठी Electronic & Communication, मेकॅनिकल पदासाठी Mechanical, तर कॉम्प्युटर सायन्स पदासाठी Computer Science शाखेतील पदवी आवश्यक आहे.

वयोमर्यादा आणि सवलत

16 सप्टेंबर 2026 रोजी उमेदवाराचे वय 18 ते 28 वर्षांदरम्यान असावे. अनुसूचित जाती आणि जमातीच्या उमेदवारांना वयोमर्यादेत 5 वर्षांची, तर OBC प्रवर्गातील उमेदवारांना 3 वर्षांची सवलत देण्यात येणार आहे.

अर्ज शुल्क किती?

या भरतीसाठी ₹750 अर्ज शुल्क आहे. परीक्षा देणाऱ्या उमेदवारांना नियमानुसार शुल्काचा काही भाग परत केला जाईल. GEN/OBC/EWS उमेदवारांना ₹500, तर SC/ST/PWD/ExSM उमेदवारांना ₹750 प्रक्रिया शुल्क परत करण्यात येणार आहे.

अर्ज करण्याची अंतिम तारीख

इच्छुक आणि पात्र उमेदवारांनी ऑनलाइन पद्धतीने अर्ज करायचा आहे. अर्ज करण्याची अंतिम तारीख 16 सप्टेंबर 2026 रात्री 11.55 वाजेपर्यंत आहे. त्यामुळे पात्र उमेदवारांनी अंतिम तारखेची वाट न पाहता आवश्यक कागदपत्रांसह लवकर अर्ज करण्याचे आवाहन करण्यात आले आहे.

नोकरीचे ठिकाण : संपूर्ण भारत