मुंबई : मराठा आरक्षणाच्या मागणीसाठी आंदोलनाची भूमिका घेणारे मनोज जरांगे पाटील यांच्या मुंबई आंदोलनाबाबत मोठी अपडेट समोर आली आहे. जरांगे पाटील यांनी मुंबईत आंदोलन करण्याचा इशारा दिल्यानंतर याविरोधात मुंबई उच्च न्यायालयात याचिका दाखल करण्यात आली होती. या याचिकेवर झालेल्या सुनावणीदरम्यान न्यायालयाने महत्त्वाच्या सूचना दिल्या आहेत.
परवानगीशिवाय मुंबईत आंदोलन करता येणार नाही, असे न्यायालयाने स्पष्ट केले आहे. मुंबईत आंदोलन करायचे असल्यास आधी संबंधित प्रशासनाची परवानगी घेणे आवश्यक असल्याचे हायकोर्टाने सुनावणीदरम्यान नमूद केले. त्यामुळे परवानगी घेतल्यानंतरच मुंबईत येऊन आंदोलन करावे लागणार आहे.
दरम्यान, मनोज जरांगे पाटील यांच्या आरोग्याबाबतही न्यायालयाने चिंता व्यक्त केली आहे. जरांगे पाटील यांच्या प्रकृतीची वैद्यकीय तपासणी करण्याच्या सूचनाही हायकोर्टाने दिल्या आहेत.
अंतरवाली सराटीत उद्या राज्यव्यापी बैठक
मनोज जरांगे पाटील यांच्या नेतृत्वाखाली मराठा समाजाच्या आंदोलनाची पुढील दिशा ठरवण्यासाठी उद्या अंतरवाली सराटी येथे राज्यव्यापी बैठक आयोजित करण्यात आली आहे. या बैठकीत मुंबई आंदोलनासह मराठा आरक्षणाच्या पुढील आंदोलनाची रणनीती निश्चित होण्याची शक्यता आहे.
मुंबईत आंदोलन करण्याच्या इशाऱ्यानंतर दाखल झालेल्या याचिकेवर हायकोर्टाने दिलेल्या आदेशामुळे आता जरांगे पाटील यांच्या पुढील भूमिकेकडे सर्वांचे लक्ष लागले आहे.
Discussion about this post