जळगाव : जळगावातील एका राजकीय कार्यक्रमात राज्याचे मंत्री गुलाबराव पाटील आणि गिरीश महाजन यांच्यात वयावरून रंगलेली मिश्कील शाब्दिक जुगलबंदी उपस्थितांच्या चांगलीच पसंतीस उतरली. दोन्ही नेत्यांनी एकमेकांची फिरकी घेत केलेल्या दिलखुलास संवादामुळे कार्यक्रमस्थळी काही काळ हास्याचे वातावरण निर्माण झाले.
या मिश्कील संवादाची सुरुवात गुलाबराव पाटील यांनी केली. त्यांनी गिरीश महाजन यांचा उल्लेख ‘ज्येष्ठ वयोवृद्ध मंत्री’ असा केला. गुलाबराव पाटलांच्या या वक्तव्यावर गिरीश महाजन यांनी त्यांच्या नेहमीच्या विनोदी शैलीत तात्काळ प्रत्युत्तर दिले.
महाजन म्हणाले, “ज्येष्ठ वयोवृद्ध मंत्री मी नाही म्हणत. नामदार गिरीशभाऊ महाजन.” त्यानंतर त्यांनी उपस्थितांकडे पाहत गुलाबराव पाटील आणि स्वतःमध्ये कोण ज्येष्ठ दिसतो, असा मिश्कील सवाल केला. “कोण ज्येष्ठ वाटतं तुम्हाला? गुलाबराव वाटतो का मी? हसून दाखवा,” असे म्हणत त्यांनी उपस्थितांमध्येही हशा पिकवला.
यानंतर महाजन यांनी गुलाबराव पाटलांची आणखी फिरकी घेतली. “लहान बंधू आणि भगिनींनो, तुम्ही लहान वाटता माझ्यापेक्षा,” असे म्हणत त्यांनी उपस्थितांना उद्देशून मिश्कील टिप्पणी केली.
इतकेच नव्हे तर गुलाबराव पाटील तरुण दिसण्याचा प्रयत्न करत असल्याचे सांगत महाजन म्हणाले, “गुलाबभाऊ, तुम्ही कितीही प्रयत्न करा तरुण व्हायचा, दाखवायचा, पण ते काही जमणार नाही.”
दोन्ही नेत्यांमधील या दिलखुलास आणि विनोदी संवादामुळे राजकीय कार्यक्रमातील वातावरण काही काळ हलकेफुलके झाले. राजकारणातील आरोप-प्रत्यारोपांपासून दूर दोन्ही नेत्यांनी एकमेकांची घेतलेली फिरकी उपस्थितांच्या चेहऱ्यावर हसू आणणारी ठरली.
Discussion about this post