जळगाव । धावत्या लक्झरी बसमधून तब्बल २५ लाख रुपयांची रोकड असलेली बॅग चोरणाऱ्या चार सराईत गुन्हेगारांना जळगाव स्थानिक गुन्हे शाखेने (LCB) अवघ्या काही दिवसांत बेड्या ठोकल्या आहेत. पोलिसांनी केवळ आरोपींनाच अटक केली नाही, तर चोरीला गेलेली २५ लाखांची संपूर्ण रोकड आणि गुन्ह्यात वापरलेली ५ लाख रुपये किमतीची मारुती डिझायर कार (MH-47-CU-7877) असा एकूण ३० लाख रुपयांचा मुद्देमाल हस्तगत केला आहे.
पारोळा येथील नितीन पुरुषोत्तम वाणी हे जळगावचे प्रसिद्ध सराफ व्यावसायिक प्रफुल्ल भागचंद सुराणा यांच्याकडे गेल्या १५ वर्षांपासून खासगी कुरिअरचे काम पाहतात. ११ जुलै २०२६ रोजी ते कोल्हापूर येथे चांदी खरेदीसाठी २५ लाख रुपयांची रोकड घेऊन ‘हरे कृष्णा ट्रॅव्हल्स’च्या बसने निघाले होते. सायंकाळी ८.३० च्या सुमारास छत्रपती संभाजीनगर जिल्ह्यातील फर्दापूर येथील ‘साई सुरुची लॉजिंग’जवळ बस जेवणासाठी थांबली. वाणी बॅग बसमध्येच ठेवून खाली उतरले. ते जेवण करून परत आले असता, त्यांना रोकडची बॅग गायब झाल्याचे आढळून आले. याप्रकरणी जळगाव एमआयडीसी पोलीस ठाण्यात भारतीय न्याय संहितेच्या कलम ३०५ (क) अंतर्गत गुन्हा दाखल करण्यात आला होता.
तांत्रिक तपासाने आवळला आवळला पाश
गुन्ह्याचे गांभीर्य ओळखून पोलीस अधीक्षक श्रीकांत धिवरे, अप्पर पोलीस अधीक्षक संदीप गावीत आणि उपविभागीय पोलीस अधिकारी नितीन गणापुरे यांच्या मार्गदर्शनाखाली वरिष्ठ पोलीस निरीक्षक राहुल गायकवाड यांच्या पथकाने समांतर तपास सुरू केला. तांत्रिक आणि गोपनीय माहितीच्या आधारे मुख्य आरोपी सोनू उर्फ राम भगवान सारवाण (वय ३२, रा. गुरुनानक नगर, शनिपेठ, जळगाव) याला पोलिसांनी ताब्यात घेतले. त्याची कसून चौकशी केली असता त्याने गुन्ह्याची कबुली देत आपल्या इतर तीन साथीदारांची नावे उघड केली.
सोनूच्या कबुलीनंतर पोलिसांनी त्याचे साथीदार शेख रहेमान शेख निसार (वय ३३, पिंप्राळा हुडको), सचिन उर्फ मंगेश सूर्यकांत झांबरे (वय ३८, कोल्हे नगर) आणि दशरथ सुरेश चौधरी (वय ३६, खंडेराव नगर) यांनाही बेड्या ठोकल्या. तपासात आरोपी शेख रहेमान याने या चोरीसाठी स्वतःची मारुती डिझायर कार दिली असल्याचे समोर आले आहे. मुख्य आरोपी सोनूबद्दल धक्कादायक माहिती समोर आली असून त्याच्यावर जळगाव शहर, शनिपेठ आणि भुसावळ रेल्वे पोलिसांत दरोडा, घरफोडी, चोरी आणि शासकीय कामात अडथळा आणल्याचे अनेक गंभीर गुन्हे आधीच दाखल आहेत.
या पथकाने केली कामगिरी
ही यशस्वी कारवाई एलसीबीचे पोलीस उपनिरीक्षक दीपक जगदाळे, संतोष पवार, सहाय्यक फौजदार अतुल वंजारी, पोलीस हवालदार अक्रम शेख, विजय पाटील, मुरलीधर धनगर, प्रवीण भालेराव, किशोर पाटील तसेच अंमलदार राहुल रगडे, प्रदीप सपकाळे, रवींद्र कापडणे आणि छगन तायडे यांच्या पथकाने केली.
Discussion about this post