जळगाव । रशियन कंपनीचे काही भाग भारतात विकले असून, त्यातून गुंतवणूक केल्यास मोठा फायदा मिळेल, असे आमिष दाखवत जळगावातील एका वकिलाची सुमारे साडेसात लाख रुपयांची फसवणूक करण्यात आली. याप्रकरणी जळगाव शहर पोलीस ठाण्यात गुन्हा दाखल करण्यात आला आहे.
विजय बाबुलाल तावडे (रा. नशिराबाद) यांनी दिलेल्या फिर्यादीनुसार, जून २०१६ ते २६ मार्च २०२० या कालावधीत संशयितांनी त्यांना ऑनलाइन गुंतवणुकीतून मोठा परतावा मिळण्याचे आमिष दाखवले. त्यानंतर विविध खात्यांमध्ये पैसे जमा करण्यास सांगून त्यांच्याकडून लाखो रुपये घेतले.
याच काळात एका संशयिताने स्वतःची ओळख रशियन कंपनीशी संबंधित व्यक्ती म्हणून करून दिली. कंपनीच्या माध्यमातून मोठा आर्थिक फायदा मिळवून देण्याचे सांगत तावडे यांचा विश्वास संपादन करण्यात आला. त्यानंतर वेगवेगळ्या कारणांनी त्यांच्याकडून पैसे घेत फसवणूक करण्यात आली.
एकाउंटरीची धमकी
फसवणुकीची रक्कम परत मागितल्यानंतर संशयितांनी टाळाटाळ करण्यास सुरुवात केली. तसेच पैसे मागण्यासाठी तगादा लावल्यास अडचणीत आणण्याची धमकी दिल्याचे फिर्यादीत नमूद आहे. संशयितांनी फसवणुकीसाठी वापरलेल्या लिंक व खात्यांच्या माध्यमातून व्यवहार केल्याचेही तपासात समोर आले आहे.
याप्रकरणी तावडे यांच्या तक्रारीवरून जळगाव शहर पोलीस ठाण्यात संशयितांविरुद्ध गुन्हा दाखल करण्यात आला असून, पोलिसांकडून आर्थिक व्यवहारांची माहिती तसेच संबंधित खात्यांचा तपास सुरू आहे. या प्रकरणाचा पुढील तपास पोलीस निरीक्षक प्रदीप ठाकूर यांच्या मार्गदर्शनाखाली सुरू आहे.
Discussion about this post