धरणगाव । धरणगाव तालुक्यातील पाळधीजवळ झालेल्या भीषण अपघातात तीन जणांचा जागीच मृत्यू झाला असून एक जण गंभीर जखमी झाला आहे. दोन दुचाकींची समोरासमोर जोरदार धडक झाल्याने हा भीषण अपघात घडला. या घटनेमुळे परिसरात हळहळ व्यक्त होत आहे.
मिळालेल्या माहितीनुसार, पाळधी (ता. धरणगाव) येथील किरण राठे (३८) हे लग्न समारंभासाठी गेले होते. तेथून परतत असताना त्यांच्या दुचाकीची समोरून येणाऱ्या दुसऱ्या दुचाकीला जोरदार धडक बसली. या अपघातात किरण राठे, चेतन पाटील (३९, रा. अंजेड, ता. भुसावळ) आणि प्रदीप उखा निकम (४०, रा. गोराड-निंभोरा, ता. यावल) यांचा जागीच मृत्यू झाला.
अपघातात गंभीर जखमी झालेल्या एका व्यक्तीला तातडीने रुग्णालयात दाखल करण्यात आले. मात्र उपचारादरम्यान त्याची प्रकृती चिंताजनक असल्याचे सांगण्यात आले आहे.
घटनेची माहिती मिळताच स्थानिक नागरिकांनी मदतकार्य सुरू केले. त्यानंतर पोलिसांनी घटनास्थळी धाव घेत पंचनामा करून मृतदेह ताब्यात घेतले. शवविच्छेदनानंतर मृतदेह नातेवाईकांच्या स्वाधीन करण्यात आले.
या दुर्घटनेमुळे तिन्ही कुटुंबांवर दुःखाचा डोंगर कोसळला असून परिसरात शोककळा पसरली आहे. पोलिसांनी अपघाताचा पुढील तपास सुरू केला आहे.
Discussion about this post