आंदोलनाचा इशारा अन् दिल्लीत कडेकोट बंदोबस्त; 35 हजार जवान तैनात

नवी दिल्ली । कॉकरोच जनता पार्टीने जंतरमंतरवर पुन्हा एकदा आंदोलनाचा नारा दिल्याने राजधानी दिल्लीमध्ये सुरक्षा यंत्रणा सतर्क झाली आहे. या आंदोलनात मोठ्या संख्येने तरुणाई सहभागी होण्याची शक्यता असल्याने दिल्ली पोलिसांसह शीघ्र कृती दल आणि अर्धसैनिक दलाच्या तब्बल 35 हजारांहून अधिक जवानांना तैनात करण्यात आले आहे. जंतरमंतर परिसराला अक्षरशः लष्करी छावणीचे स्वरूप आले असून, राजधानीतील प्रमुख चौक आणि संवेदनशील भागांमध्येही कडेकोट बंदोबस्त ठेवण्यात आला आहे.

केंद्रीय गृह सचिवांनी दिल्लीतील सुरक्षा व्यवस्थेचा आढावा घेत चोख बंदोबस्ताचे निर्देश दिल्यानंतर पोलिसांनी मोठ्या प्रमाणावर प्रतिबंधात्मक कारवाई सुरू केली आहे. सकाळपर्यंत 200 हून अधिक संभाव्य आंदोलकांना ताब्यात घेण्यात आल्याची माहिती असून, धरपकड अद्यापही सुरू असल्याचे सांगण्यात येत आहे.

आंदोलकांना दहा ठिकाणी ठेवण्याची तयारी

पोलिस सूत्रांनी दिलेल्या माहितीनुसार, शनिवारी आंदोलनात सहभागी होण्यासाठी येणाऱ्या कॉकरोच जनता पार्टीच्या सदस्यांना आणि आंदोलकांना ताब्यात घेण्यात येणार आहे. त्यांना दिल्लीतील सुमारे दहा वेगवेगळ्या ठिकाणी ठेवण्याची योजना पोलिसांनी आखली आहे. गोपनीय माहितीनुसार मोठ्या संख्येने आंदोलक राजधानीत दाखल होण्याची शक्यता असल्याने पोलिसांनी आधीच ही तयारी केली आहे.

ताब्यात घेतलेल्या आंदोलकांना दिल्लीपासून तुलनेने दूर असलेल्या ठिकाणी हलविण्यात येणार असून, त्यांना पुन्हा आंदोलनाच्या ठिकाणी पोहोचता येऊ नये, यासाठी विशेष नियोजन करण्यात आले आहे.

या ठिकाणी ठेवणार आंदोलकांना

दिल्ली पोलिसांनी संभाव्य आंदोलकांना ठेवण्यासाठी काही ठिकाणे निश्चित केली आहेत. यामध्ये मॉडेल टाऊनमधील छत्रसाल स्टेडियम, न्यू पोलिस लाईन, बवाना येथील राजीव गांधी स्टेडियम, नांगलोईमधील सूरजमल स्टेडियम तसेच दक्षिण दिल्लीतील त्यागराज स्टेडियम आणि जवाहरलाल नेहरू स्टेडियमचा समावेश असल्याची माहिती आहे. या ठिकाणी पोलिसांचा अतिरिक्त बंदोबस्त तैनात करण्यात आला आहे.

निवडणूक आयुक्तांच्या राजीनाम्याच्या मागणीवरून आंदोलन

मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी काँग्रेसकडून गेल्या चार दिवसांपासून दिल्लीमध्ये आंदोलन सुरू आहे. विरोधी पक्षनेते राहुल गांधी, खासदार प्रियंका गांधी यांच्यासह काँग्रेसच्या अन्य खासदारांनी दिल्लीतील विविध भागांमध्ये आंदोलन करत सरकारवर निशाणा साधला.

आता आजपासून कॉकरोच जनता पार्टीनेही जंतरमंतरवर आंदोलनाची हाक दिल्याने दिल्ली पोलिसांनी हायअलर्ट जारी केला आहे. यापूर्वीच्या आंदोलनांचा अनुभव लक्षात घेता राजधानीतील संवेदनशील भागांमध्ये मोठा पोलीस बंदोबस्त ठेवण्यात आला असून, परिस्थितीवर बारकाईने लक्ष ठेवले जात आहे.