महाराष्ट्रात गोळीबाराच्या घटनांमध्ये सातत्याने वाढ होत असताना आता कोल्हापुरात भरदिवसा भाजप कार्यकर्त्यावर गोळीबार झाल्याची धक्कादायक घटना घडली आहे. सुरज साखरे असे जखमी कार्यकर्त्याचे नाव असून, या घटनेमुळे शहरात एकच खळबळ उडाली आहे.
ही घटना कोल्हापूर शहरातील नवी वाशी नाका परिसरात घडली. प्राथमिक माहितीनुसार, दोन अज्ञात हल्लेखोरांनी सुरज साखरे यांच्यावर गोळीबार केला. गोळीबारात ते जखमी झाले असून त्यांना तातडीने उपचारासाठी खासगी रुग्णालयात दाखल करण्यात आले. सुदैवाने त्यांची प्रकृती स्थिर असल्याचे समजते.
प्राथमिक तपासात खासगी सावकारीच्या व्यवहारातून हा हल्ला झाला असावा, असा संशय पोलिसांनी व्यक्त केला आहे. तसेच सुरज साखरे यांच्यावर यापूर्वीही काही गुन्ह्यांची नोंद असल्याची माहिती समोर येत असून, या सर्व बाबींचा तपास सुरू आहे.
घटनेची माहिती मिळताच वरिष्ठ पोलीस अधिकारी आणि स्थानिक पोलीस घटनास्थळी दाखल झाले. परिसराची पाहणी करून सीसीटीव्ही फुटेज आणि अन्य पुरावे तपासण्याचे काम सुरू करण्यात आले आहे. फरार झालेल्या दोन्ही संशयितांचा शोध घेण्यासाठी विशेष पथके रवाना करण्यात आली आहेत.
भरदिवसा झालेल्या या गोळीबारामुळे परिसरात काही काळ भीतीचे वातावरण निर्माण झाले. शहरातील वाढत्या गुन्हेगारीच्या पार्श्वभूमीवर कायदा व सुव्यवस्थेचा प्रश्न पुन्हा एकदा ऐरणीवर आला असून, या प्रकरणातील आरोपींना लवकरात लवकर अटक करण्याची मागणी नागरिकांकडून होत आहे.
दरम्यान, या घटनेचा नेमका हेतू काय होता, गोळीबारामागे कोणाचा सहभाग आहे आणि खासगी सावकारीचा वादच कारणीभूत होता का, याचा सखोल तपास कोल्हापूर पोलीस करत आहेत.
Discussion about this post