भुसावळ । शहरातील जामनेर रोडवरील शेठ घासीलाल अँड सन्स या दुकानासमोर रिक्षाला आग लागल्याची धक्कादायक घटना घडली. ग्राहक वडा घेण्यासाठी दुकानात गेले असताना रिक्षा चालकाने आपली रिक्षा भट्टीजवळ सुरू अवस्थेत ठेवली होती.
दरम्यान, गॅसच्या ज्वाळेमुळे अचानक रिक्षेला आग लागली. काही क्षणातच आगीने भीषण रूप धारण केल्याने परिसरात नागरिकांची मोठी गर्दी झाली आणि एकच खळबळ उडाली.
घटनेची माहिती मिळताच अग्निशमन दल घटनास्थळी तात्काळ दाखल झाले. त्यांनी वेगाने कारवाई करत आगीवर नियंत्रण मिळवले. या आगीत रिक्षेचे मोठ्या प्रमाणात नुकसान झाले असून वाहन पूर्णतः जळून खाक झाल्याचे सांगण्यात येत आहे.
सुदैवाने या घटनेत कोणतीही जीवितहानी झाली नाही. मात्र, निष्काळजीपणामुळे अशा घटना घडत असल्याने नागरिकांकडून चिंता व्यक्त केली जात असून, सार्वजनिक ठिकाणी वाहन उभे करताना आणि गॅसजवळ सावधगिरी बाळगण्याची गरज व्यक्त केली जात आहे.
Discussion about this post