भुसावळ । शहरातील कायदा व सुव्यवस्था अबाधित ठेवण्यासाठी आणि गुन्हेगारी कारवायांना कठोर आळा घालण्यासाठी भुसावळ पोलिसांनी धडक मोहीम हाती घेतली आहे. याचाच एक भाग म्हणून, वारंवार गुन्हे करून दहशत माजवणाऱ्या आगवाली चाळ परिसरातील सराईत गुन्हेगार सम्राटकुमार सुरेश बनसोडे (वय ३७) याच्यावर ‘एमपीडीए’ (MPDA) कायद्यान्वये स्थानबद्धतेची कठोर कारवाई करण्यात आली आहे. जिल्हाधिकाऱ्यांच्या आदेशानुसार त्याला थेट ठाणे मध्यवर्ती कारागृहात डांबण्यात आले आहे.
गुन्हेगारी पार्श्वभूमी आणि प्रस्ताव:
सम्राटकुमार बनसोडे याच्याविरुद्ध भुसावळ शहर व तालुका पोलिस ठाण्यात मारामारी, जीवे मारण्याची धमकी देणे आणि गंभीर दुखापत करणे यांसारखे पाच गंभीर गुन्हे दाखल आहेत. त्याच्यावर यापूर्वी प्रतिबंधात्मक कारवाई आणि हद्दपारीचा प्रस्तावही दाखल करण्यात आला होता. मात्र, त्यानंतरही त्याच्या वर्तनात कोणतीही सुधारणा झाली नाही. उलट त्याच्या कृत्यांमुळे सर्वसामान्य नागरिकांच्या जीवितास व मालमत्तेस मोठा धोका निर्माण झाला होता.
ही बाब गांभीर्याने घेत भुसावळ तालुका पोलिस ठाण्याचे निरीक्षक महेश गायकवाड यांनी बनसोडेविरुद्ध एमपीडीएअंतर्गत स्थानबद्धतेचा प्रस्ताव तयार करून पोलिस अधीक्षकांमार्फत जिल्हाधिकाऱ्यांकडे सादर केला. यानंतर जिल्हाधिकाऱ्यांनी ४ सप्टेंबर रोजी बनसोडेच्या स्थानबद्धतेचे आदेश जारी केले.
वरिष्ठ अधिकाऱ्यांच्या मार्गदर्शनाखाली भुसावळ तालुका पोलिस ठाण्याच्या पथकाने ही कारवाई फत्ते केली. पोलिस अधीक्षक श्रीकांत धिवरे, अपर पोलिस अधीक्षक संदीप गावीत आणि उपविभागीय पोलिस अधिकारी केदार बारबोले यांच्या मार्गदर्शनाखाली, परिविक्षाधीन पोलिस उपअधीक्षक तथा प्रभारी अधिकारी प्रशांत दरेकर आणि त्यांच्या पथकाने आरोपीला बेड्या ठोकल्या. त्यानंतर जिल्हाधिकाऱ्यांच्या आदेशानुसार त्याची ठाणे मध्यवर्ती कारागृहात रवानगी करण्यात आली.
Discussion about this post