बारामती (पुणे): बारामती तालुक्यात गेल्या काही महिन्यांपासून विमान कोसळण्याच्या घटनांचे सत्र थांबताना दिसत नाहीये. आज पुन्हा एकदा बारामती विमानतळाच्या धावपट्टीजवळील गोजुबावी परिसरातील एका शेतात शिकाऊ विमान कोसळल्याची खळबळजनक घटना घडली आहे. सुदैवाने, या भीषण अपघातात विमानातील दोन्ही शिकाऊ वैमानिक पूर्णपणे सुरक्षित असून मोठी जीवितहानी टळली आहे.
मिळालेल्या माहितीनुसार, बारामतीमध्ये वैमानिक प्रशिक्षण देणाऱ्या ‘रेडबर्ड’ या खाजगी कंपनीच्या विमानाने नेहमीप्रमाणे दोन शिकाऊ वैमानिकांना घेऊन सरावासाठी उड्डाण केले होते. मात्र, उड्डाण केल्यानंतर काही वेळातच विमानात अचानक तांत्रिक बिघाड झाला. तांत्रिक बिघाडामुळे विमानाने नियंत्रण गमावले आणि ते थेट गोजुबावी गावाजवळील शेतात कोसळले. विमान कोसळताना मोठा आवाज झाल्याने परिसरातील स्थानिक ग्रामस्थांनी तातडीने मदतीसाठी शेताकडे धाव घेतली.
विमानात अचानक बिघाड झालेला असतानाही वैमानिकाने कमालीचे प्रसंगावधान राखले. अत्यंत कौशल्याने विमानाचे लँडिंग करण्याचा प्रयत्न केल्यामुळे मोठा अनर्थ टळला आणि विमानातील दोन्ही शिकाऊ वैमानिकांचे प्राण वाचले. या अपघातात विमानाचे किरकोळ नुकसान झाले आहे. घटनेची माहिती मिळताच स्थानिक पोलीस प्रशासन आणि विमान प्रशिक्षण संस्थेचे अधिकारी तातडीने घटनास्थळी दाखल झाले असून पंचनाम्याचे काम सुरू करण्यात आले आहे.
विशेष म्हणजे, ज्या गोजुबावी परिसरात आज हा अपघात झाला, त्याच भागात काही काळापूर्वी राज्याचे उपमुख्यमंत्री अजित पवार यांचेही विमान कोसळल्याची घटना घडली होती. आता त्याच भागात हा दुसरा अपघात झाल्यामुळे गोजुबावी परिसरातील भौगोलिक स्थिती, हवेचा दाब किंवा इतर तांत्रिक कारणांबाबत विमान तज्ज्ञांमध्ये आणि नागरिकांमध्ये उलटसुलट चर्चा सुरू झाली आहे. बारामतीमध्ये प्रशिक्षण विमानांच्या सुरक्षिततेचा प्रश्न यामुळे पुन्हा एकदा ऐरणीवर आला आहे.
Discussion about this post