मुंबई : नाशिक येथील भोंदू बाबा अशोक खरातच्या काळ्या कृत्यांचा पर्दाफाश झाल्यानंतर, आता या प्रकरणाचे धागेदोरे राजकीय वर्तुळापर्यंत पोहोचले आहेत. खरात प्रकरणात माजी महिला आयोग अध्यक्षा रुपाली चाकणकर यांच्या अडचणी वाढण्याची शक्यता असून खरातसोबत कोणताही थेट संबंध नसल्याचा दावा करणाऱ्या चाकणकर यांच्या गुवाहाटी दौऱ्याची माहिती समोर आल्यानंतर राजकीय वर्तुळात मोठी चर्चा रंगली आहे.
मिळालेल्या माहितीनुसार, २०२१ मध्ये अशोक खरात, रुपाली चाकणकर आणि त्यांच्या भगिनी प्रतिभा चाकणकर यांनी एकत्रितपणे गुवाहाटी दौरा केला होता. २८ ऑगस्ट ते ३० ऑगस्ट २०२१ दरम्यान तिघेही गुवाहाटीतील रेडिसन ब्लू हॉटेलमध्ये वास्तव्यास होते, अशी माहिती समोर आली आहे. या काळात त्यांनी कामाख्या देवी मंदिरासह काही धार्मिक स्थळांना भेट दिल्याची चर्चा आहे.
विशेष म्हणजे, अशोक खरातविरोधातील प्रकरणात आर्थिक अफरातफर आणि कथित फसवणुकीचे आरोप तपासात असताना, रुपाली चाकणकर यांना अंमलबजावणी संचालनालयाकडून (ईडी) चौकशीसाठी समन्स बजावण्यात आल्याची माहिती समोर आली आहे. आज गुरुवारी त्यांची चौकशी होण्याची शक्यता व्यक्त केली जात आहे.
कसे उघड झाले खरातचे कारनामे?
अशोक खरात याने अध्यात्माच्या नावाखाली श्रीमंत भक्तांना लुटणे आणि शेकडो महिलांचे लैंगिक शोषण केल्याचे धक्कादायक प्रकार समोर आले होते. त्याच्याच कार्यालयातील एका कर्मचाऱ्याने हे सर्व कारनामे चव्हाट्यावर आणले. या प्रकरणामुळे चाकणकर यांना आपल्या पदाचा राजीनामा द्यावा लागला होता. “मी केवळ आध्यात्मिक गुरू म्हणून त्यांना मानत होते,” असा बचाव चाकणकर यांनी सुरुवातीला केला होता. मात्र, बहिणीसह केलेला गुवाहाटी दौरा आणि हॉटेलमधील एकत्र वास्तव्य समोर आल्याने त्यांचा हा दावा आता कमकुवत ठरला आहे.
दरम्यान, विरोधकांनी या प्रकरणात रुपाली चाकणकर यांच्या आर्थिक व्यवहारांची सखोल चौकशी करण्याची मागणी केली आहे. एसआयटी चौकशीनंतर आता ईडीची एंट्री झाल्याने या प्रकरणाला आणखी वेगळे वळण मिळण्याची शक्यता वर्तवली जात आहे.
Discussion about this post