चोपड्यात शस्त्रतस्करीचा डाव उधळला; LCBच्या कारवाईत तिघे जेरबंद, ६ लाखांचा मुद्देमाल जप्त

चोपडा | जळगाव जिल्हा पोलिसांनी बेकायदेशीर शस्त्रास्त्रांविरोधात मोठी कारवाई करत आंतरजिल्हा शस्त्रतस्करी करणाऱ्या तिघांना अटक केली आहे. स्थानिक गुन्हे शाखा (LCB) आणि चोपडा शहर पोलिसांनी संयुक्तपणे राबविलेल्या या मोहिमेत गावठी पिस्तूल, दोन मॅगझिन, तीन मोबाईल फोन आणि एक कार असा सुमारे ६ लाख रुपयांचा मुद्देमाल जप्त करण्यात आला.

पोलीस अधीक्षक श्रीकांत धिवरे यांच्या मार्गदर्शनाखाली अपर पोलीस अधीक्षक अशोक नखाते आणि उपविभागीय पोलीस अधिकारी सुनील पाटील यांच्या देखरेखीखाली ही कारवाई करण्यात आली. १ जुलै रोजी स्थानिक गुन्हे शाखेला मिळालेल्या गुप्त माहितीनुसार काही संशयित व्यक्ती Hyundai EON कारमधून गावठी कट्टा घेऊन लासूर–चुंचाळे मार्गे चोपड्याकडे येत असल्याची माहिती पोलिसांना मिळाली होती.

या माहितीच्या आधारे स्थानिक गुन्हे शाखा आणि चोपडा शहर पोलिसांनी शनिमंदिर परिसरात सापळा रचला. सायंकाळी साडेसातच्या सुमारास संशयित कार अडवून पंचांसमक्ष तपासणी करण्यात आली. तपासादरम्यान कारच्या मागील सीटखाली एक गावठी पिस्तूल, त्यासोबत मॅगझिन आणि एक अतिरिक्त मॅगझिन सापडले. आरोपींकडून तीन मोबाईल फोनही जप्त करण्यात आले.

या प्रकरणात ज्ञानेश्वर रामकृष्ण माळी (रा. कुन्हाड खुर्द, ता. पाचोरा), सचिन रोशन पवार (रा. मयूर पार्क कॉलनी, गंगापूर) आणि अनिल कचरे साळुंखे (रा. जाधव गल्ली, गंगापूर) या तिघांना पोलिसांनी अटक केली आहे. या आरोपींचे इतर गुन्हेगारी टोळ्यांशी संबंध आहेत का, तसेच ही शस्त्रे कोणाला पुरविण्यात येणार होती, याचा तपास सुरू आहे.

जप्त करण्यात आलेल्या मुद्देमालामध्ये सुमारे ६० हजार रुपये किमतीचे गावठी पिस्तूल व मॅगझिन, १० हजार रुपयांचे अतिरिक्त मॅगझिन, ५ लाख रुपयांची Hyundai EON कार आणि सुमारे ३० हजार रुपये किमतीचे Oppo, Vivo व Redmi कंपनीचे तीन मोबाईल फोन यांचा समावेश आहे. एकूण जप्तीची किंमत जवळपास ६ लाख रुपये असल्याचे पोलिसांनी सांगितले.

या प्रकरणी चोपडा शहर पोलीस ठाण्यात गुन्हा दाखल करण्यात आला असून पुढील तपास सुरू आहे. ही कारवाई स्थानिक गुन्हे शाखेचे पोलीस निरीक्षक राहुल गायकवाड आणि चोपडा शहर पोलीस निरीक्षक पवन देसले यांच्या नेतृत्वाखाली पार पडली. या मोहिमेत पोलीस उपनिरीक्षक जितेंद्र वल्टे, दीपक माळी, रविंद्र पाटील, विष्णू बिन्हाडे, रावसाहेब पाटील, सहाय्यक पोलीस निरीक्षक एकनाथ भिसे, युवराज बाकुंज तसेच अन्य अधिकारी व कर्मचाऱ्यांनी सक्रिय सहभाग घेतला.