नशिराबाद नजीक राखेचा डंपर अन् ट्रकमध्ये समोरासमोर धडक, चालक जागीच ठार

जळगाव । जळगाव जिल्ह्यात अपघाताच्या घटना वाढताना दिसत असून अशातच जळगाव–भुसावळ राष्ट्रीय महामार्गावर नशिराबादजवळ गुरुवारी रात्री भीषण अपघाताची घटना समोर आलीय. मकरा फटाक्यांसमोर सोयाबीन वाहून नेणारा ट्रक आणि राखेच्या डंपरची समोरासमोर जोरदार धडक झाली. या दुर्घटनेत ट्रकचालक रमेश चंद्र यादव (वय ५६, रा. उत्तर प्रदेश) यांचा मृत्यू झाला, तर डंपरचालक मुक्तचर अली (रा. मध्य प्रदेश) गंभीर जखमी झाले. अपघातानंतर ट्रकच्या केबिनमध्ये अडकलेल्या यादव यांना बाहेर काढण्यासाठी तब्बल एक तास प्रयत्न करावे लागले. या घटनेमुळे परिसरात हळहळ व्यक्त होत असून, अपघातामुळे महामार्गावरील वाहतूक सुमारे तीन तास विस्कळीत झाली होती.

मिळालेल्या माहितीनुसार, गुजरातहून नागपूरच्या दिशेने सोयाबीन घेऊन जाणारा ट्रक (एमएच ४० बीजी ६२८७) रमेश चंद्र यादव चालवत होते. गुरुवारी रात्री दहाच्या सुमारास नशिराबादजवळील मकरा फटाक्यांसमोर हा ट्रक आला असता, दीपनगर येथून जळगावच्या दिशेने राख घेऊन जाणाऱ्या डंपरशी (एमएच १५ जीडब्ल्यू ३८७९) त्याची जोरदार धडक झाली.दोन्ही वाहनांची धडक इतकी भीषण होती की, वाहनांचे मोठ्या प्रमाणात नुकसान झाले. या धडकेत ट्रकचालक यादव केबिनमध्येच अडकून पडले. अपघातानंतर घटनास्थळी एकच गोंधळ उडाला.

स्थानिक नागरिकांनी धाव घेत सुरू केले मदतकार्य

अपघाताची माहिती मिळताच स्थानिक नागरिक सतीश बेलसरे, त्यांचे सहकारी आणि ग्रामस्थांनी घटनास्थळी धाव घेतली. केबिनमध्ये अडकलेल्या चालकाला सुरक्षित बाहेर काढण्यासाठी तातडीने प्रयत्न सुरू करण्यात आले. मात्र, ट्रकच्या केबिनमध्ये चालक अडकल्याने बचावकार्यात अडथळे येत होते.

अखेर क्रेनच्या साहाय्याने ट्रक हलवून तब्बल एक तासाच्या अथक प्रयत्नांनंतर रमेश यादव यांना बाहेर काढण्यात आले. त्यानंतर त्यांना तातडीने जळगाव येथील शासकीय वैद्यकीय महाविद्यालय व रुग्णालयात (जीएमसी) दाखल करण्यात आले. मात्र, डॉक्टरांनी तपासणी केल्यानंतर त्यांना मृत घोषित केले. बचावासाठी प्रयत्नांची पराकाष्ठा करूनही त्यांचा जीव वाचू शकला नाही.

डंपरचालकाच्या पायाला गंभीर दुखापत

या अपघातात डंपरचालक मुक्तचर अली यांच्या पायाला गंभीर दुखापत झाली आहे. त्यांना उपचारासाठी रुग्णालयात दाखल करण्यात आले. अपघातामुळे महामार्गावरील वाहतुकीला मोठा अडथळा निर्माण झाला. दोन्ही वाहनांचे नुकसान आणि बचावकार्य यामुळे सुमारे तीन तास वाहनांच्या लांबच लांब रांगा लागल्या होत्या. परिणामी, या मार्गावरून प्रवास करणाऱ्या वाहनचालकांना आणि प्रवाशांना वाहतूक कोंडीचा सामना करावा लागला.