चमोली : उत्तराखंडमधील चमोली जिल्ह्यातून एक धक्कादायक बातमी समोर आली आहे. बद्रीनाथ धाम येथून परत येत असलेल्या एका हेलिकॉप्टरचा अचानक संपर्क तुटल्याने खळबळ उडाली आहे. बद्रीनाथ धाम आणि जोशीमठदरम्यान हे हेलिकॉप्टर बेपत्ता झाल्याची माहिती समोर आली आहे. या हेलिकॉप्टरमध्ये पाच प्रवासी आणि एक पायलट असल्याची प्राथमिक माहिती आहे. हेलिकॉप्टरचा अपघात झाल्याची शक्यता व्यक्त केली जात असून प्रशासनाकडून युद्धपातळीवर शोधमोहीम सुरू करण्यात आली आहे.
बद्रीनाथहून परतताना हेलिकॉप्टर बेपत्ता
मिळालेल्या माहितीनुसार, संबंधित हेलिकॉप्टर बद्रीनाथ धाम येथून प्रवाशांना घेऊन परत येत होते. मात्र, बद्रीनाथ आणि जोशीमठ या दोन ठिकाणांदरम्यान अचानक हेलिकॉप्टरची लोकेशन मिळेनाशी झाली. हेलिकॉप्टरमध्ये पाच प्रवाशांसह एक पायलट असल्याची माहिती आहे. संपर्क तुटल्यानंतर संबंधित यंत्रणांनी तातडीने हालचाली सुरू केल्या.
जिल्हा प्रशासनाकडून रेस्क्यू ऑपरेशन सुरू
घटनेची माहिती मिळताच चमोली जिल्हा प्रशासनाने हेलिकॉप्टरचा शोध घेण्यासाठी बचावकार्य सुरू केले आहे. चमोलीचे जिल्हाधिकारी गौरव कुमार यांनी याबाबत माहिती देताना सांगितले की, हेलिकॉप्टरची लोकेशन मिळत नसल्याची माहिती प्राप्त होताच प्रशासनाने तातडीने रेस्क्यू ऑपरेशन हाती घेतले आहे.
प्रशासनाच्या पथकांसोबतच संबंधित हेलिकॉप्टर कंपनीचे पथकही शोधकार्यात सहभागी झाले आहे. हेलिकॉप्टर नेमके कुठे बेपत्ता झाले आणि त्यामध्ये असलेल्या प्रवाशांची सद्यस्थिती काय आहे, याबाबत अद्याप अधिकृत माहिती समोर आलेली नाही.
दरम्यान, हेलिकॉप्टरचा अपघात झाला आहे की अन्य काही कारणामुळे त्याचा संपर्क तुटला आहे, हे शोधकार्यानंतरच स्पष्ट होणार आहे. या घटनेमुळे उत्तराखंडमध्ये चिंतेचे वातावरण निर्माण झाले आहे.
Discussion about this post