मुंबई । पुढील काही महिन्यांमध्ये राज्यात स्थानिक स्वराज्य संस्थांच्या निवडणुका होण्याची शक्यता आहे, मात्र त्याचपूर्वी महायुती आणि महाविकास आघाडी यांच्यामध्ये इनकमिंग आणि आउंट गोईंग सुरु असल्याचे पाहायला मिळते. यातच आता एकनाथ शिंदेंना मोठा धक्का बसला असून शिवसेनेतील बडा नेता पक्षातून बाहेर पडला आहे.
कोल्हापुरातील शिवसेना शिंदे गटाचे विद्यमान जिल्हाध्यक्ष, मुरगुड नगरपालिकेचे माजी नगराध्यक्ष राजेखान जमादार यांनी पक्षातून बाहेर पडण्याचा निर्णय घेतला आहे. त्यांनी उपमुख्यमंत्री अजित पवार यांच्या राष्ट्रवादी काँग्रेस पक्षामध्ये प्रवेश केला आहे. त्यांच्यासोबत गोकुळ दूध संघाचे माजी अध्यक्ष रणजीतसिंह पाटील यांनीही राष्ट्रवादी काँग्रेसमध्ये पक्षप्रवेश केला आहे.
रणजित सिंह पाटील हे माजी नगराध्यक्ष प्रवीण सिंह पाटील यांचे बंधू आहेत. राजेखान जमादार हे रणजित सिंह यांचे निकटवर्तीय आहेत. प्रवीण सिंह पाटील यांनी हसन मुश्रीफ गटातून बाहेर पडून भाजपमध्ये प्रवेश करण्याचे जाहीर केले होते. त्यानंतर रणजिंत सिंह आणि राजेखान जमादार यांनी कोल्हापुरात मुश्रीफ गटामध्ये जाण्याचा निर्णय घेतला. आज दोन्ही नेत्यांचा पक्षप्रवेश झाला.
मुंबईमध्ये जेखान जमादार आणि रणजित सिंह पाटील यांचा अजित पवारांच्या राष्ट्रवादी काँग्रेसमध्ये प्रवेश केला. या कार्यक्रमाला राष्ट्रवादी काँग्रेस पक्षाचे प्रदेशाध्यक्ष सुनील तटकरे आणि वैद्यकीय शिक्षण मंत्री हसन मुश्रीफ उपस्थित होते. दोन्ही नेत्यांसह अनेक कार्यकर्ते राष्ट्रवादी काँग्रेसमध्ये सामील झाले.
Discussion about this post