उत्तराखंड : उत्तराखंडमध्ये मंगळवारी सकाळी भीषण रस्ते अपघाताची घटना घडली आहे. हरिद्वारहून चमोलीकडे जाणारी प्रवाशांनी भरलेली बस ऋषिकेशजवळील गुलार बाजार परिसरात पुलावरून खाली कोसळली. या दुर्घटनेत आठ जणांचा मृत्यू झाला असून अनेक प्रवासी गंभीर जखमी झाले आहेत. अपघाताच्या वेळी बसमध्ये ३० ते ३५ प्रवासी असल्याची प्राथमिक माहिती आहे. घटनेनंतर परिसरात एकच खळबळ उडाली.
मिळालेल्या माहितीनुसार, मुनिकिरेती पोलीस ठाण्याच्या हद्दीत बद्रीनाथ महामार्गावरील गुलेर परिसरात हा अपघात झाला. विश्वनाथ सेवेची बस हरिद्वारहून चमोलीच्या दिशेने जात असताना चालकाचे नियंत्रण सुटल्याने बस पुलावरून खाली कोसळली. बस थेट पाण्यात पडल्याने अनेक प्रवासी बसमध्ये अडकले. अपघाताची माहिती मिळताच पोलीस, प्रशासन आणि एसडीआरएफच्या पथकांनी तातडीने घटनास्थळी धाव घेतली.
१९ जखमींना रुग्णालयात दाखल
अपघातानंतर एसडीआरएफ आणि पोलिसांनी युद्धपातळीवर बचावकार्य सुरू केले. आतापर्यंत १९ जखमी प्रवाशांना बाहेर काढून ऋषिकेश येथील एम्स रुग्णालयात दाखल करण्यात आले आहे. या दुर्घटनेत आठ जणांचा मृत्यू झाल्याची माहिती प्रशासनाकडून देण्यात आली आहे. काही प्रवासी बेपत्ता असल्याने त्यांचा शोध घेण्यासाठी बचाव पथकांकडून प्रयत्न सुरू आहेत.
एसडीआरएफच्या अधिकाऱ्यांनी दिलेल्या माहितीनुसार, अपघाताची माहिती मिळताच ब्यासी आणि धलवाला चौक्यांमधील पथके तातडीने घटनास्थळी रवाना झाली. घटनास्थळी पोहोचल्यानंतर जवानांनी बचावकार्य सुरू केले. अपघाताची तीव्रता इतकी भीषण होती की बसचे मोठ्या प्रमाणात नुकसान झाले आहे. पाण्यात अडकलेल्या प्रवाशांना बाहेर काढण्यासाठी विशेष प्रयत्न केले जात आहेत.
दरम्यान, उत्तराखंडमध्ये आणखी एका भीषण अपघातात चार जणांचा मृत्यू झाला आहे. रुद्रप्रयाग जिल्ह्यात सोमवारी रात्री लग्नसमारंभातून परतणारी कार अनियंत्रित होऊन खोल दरीत कोसळली. रात्री सुमारे नऊ वाजण्याच्या सुमारास हा अपघात घडला. कारमध्ये एकूण दहा जण प्रवास करत होते.
या दुर्घटनेत चौघांचा जागीच मृत्यू झाला, तर सहा जण जखमी झाले आहेत. जखमींना उपचारासाठी रुग्णालयात दाखल करण्यात आले असून, त्यापैकी चौघांची प्रकृती चिंताजनक असल्याचे सांगण्यात येत आहे. त्यांच्यावर श्रीनगर येथील रुग्णालयात उपचार सुरू आहेत.उत्तराखंडमध्ये अवघ्या काही तासांच्या अंतराने घडलेल्या या दोन भीषण अपघातांमुळे हळहळ व्यक्त केली जात आहे.















Discussion about this post