नवी दिल्ली । निवडणूक आयोगाविरोधातील आंदोलन अधिक तीव्र करत INDIA आघाडीच्या खासदारांनी दिल्लीमध्ये काढलेला मोर्चा पोलिसांनी रोखला. संसद भवनाच्या मकर द्वारातून निवडणूक आयोगाच्या मुख्यालयाकडे निघालेल्या खासदारांना पुढे जाण्याची परवानगी देण्यात आली नाही. त्यानंतर लोकसभेतील विरोधी पक्षनेते राहुल गांधी यांच्यासह अनेक खासदारांनी संसद मार्गावरच धरणे आंदोलन सुरू केले.
विरोधी पक्षांकडून मुख्य निवडणूक आयुक्त ज्ञानेश कुमार यांच्या राजीनाम्याची मागणी करण्यात येत आहे. तसेच मतदार यादीच्या विशेष सखोल पुनरीक्षणाची (SIR) प्रक्रिया मागे घेण्याची मागणीही करण्यात आली आहे. मतदार यादीत मोठ्या प्रमाणात गैरप्रकार झाल्याचा आरोप विरोधकांकडून करण्यात येत आहे.
संसद भवनापासून मोर्चाला सुरुवात
राहुल गांधी यांच्यासह INDIA आघाडीतील अनेक खासदार संसद भवनाच्या मकर द्वारातून निवडणूक आयोगाच्या कार्यालयाच्या दिशेने निघाले. मोर्चाच्या पार्श्वभूमीवर संसद परिसर तसेच निवडणूक आयोगाच्या कार्यालयाभोवती मोठा पोलीस बंदोबस्त तैनात करण्यात आला होता. मोर्चाच्या मार्गावर ठिकठिकाणी बॅरिकेड्स लावण्यात आले होते. दिल्ली पोलिसांसह निमलष्करी दलाचे जवानही मोठ्या संख्येने तैनात करण्यात आले होते. खासदारांना पुढे जाण्यापासून रोखण्यात आल्यानंतर त्यांनी संसद मार्गावरच आंदोलन सुरू केले.
जमावबंदीच्या आदेशामुळे मोर्चाला अडथळा
दिल्ली पोलिसांच्या माहितीनुसार, भारतीय नागरिक सुरक्षा संहितेच्या कलम १६३ अंतर्गत जमावबंदीचे आदेश लागू आहेत. त्यामुळे मोठ्या संख्येने नागरिकांना एकत्र येण्यास निर्बंध आहेत. निवडणूक आयोगाच्या मुख्य प्रवेशद्वारासह जंतर-मंतर परिसरातही सुरक्षा व्यवस्था वाढवण्यात आली होती.या मोर्चामध्ये INDIA आघाडीचे १४० हून अधिक खासदार सहभागी होण्याची शक्यता व्यक्त करण्यात आली होती. मकर द्वारापासून निवडणूक आयोगाच्या कार्यालयापर्यंतच्या मार्गावर दिल्ली पोलिसांसह निमलष्करी दलाच्या अनेक तुकड्या तैनात करण्यात आल्या होत्या.
आंदोलनाच्या पार्श्वभूमीवर ९ एफआयआर, १८ जणांना अटक
निवडणूक आयोगाविरोधातील आंदोलनाच्या पार्श्वभूमीवर जंतर-मंतर परिसरात गेल्या काही दिवसांत पोलिसांनी ९ एफआयआर दाखल केल्याची माहिती समोर आली आहे. जमावबंदीच्या आदेशाचे उल्लंघन, दंगल आणि कर्तव्यावर असलेल्या पोलिसांवर हल्ला केल्याच्या आरोपांखाली हे गुन्हे दाखल करण्यात आले आहेत. पोलिसांच्या माहितीनुसार, या प्रकरणात १८ जणांना अटक करण्यात आली असून ३०० हून अधिक जणांना ताब्यात घेऊन नंतर सोडण्यात आले आहे. विरोधकांचे आंदोलन २ ऑक्टोबरपासून सुरू असून, आंदोलनाचा पुढील टप्पा म्हणून आठवड्याच्या अखेरीस आणखी प्रदर्शन होण्याची शक्यता आहे.
CJPचेही १० ऑक्टोबरला आंदोलन
दरम्यान, कॉकरोच जनता पार्टी (CJP)नेही मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी १० ऑक्टोबर रोजी जंतर-मंतरवर आंदोलन करण्याची घोषणा केली आहे. त्यामुळे निवडणूक आयोगाविरोधातील आंदोलनाची व्याप्ती आणखी वाढण्याची शक्यता आहे. विरोधकांच्या आंदोलनामुळे निवडणूक आयोग आणि विरोधी पक्षांमधील राजकीय संघर्ष पुन्हा एकदा चर्चेत आला आहे.
Discussion about this post