जळगाव । जळगावच्या मेहरुण परिसरातील छत्रपती शिवाजी उद्यानाजवळ उघड्या गटारीत दुचाकी आदळून एका ३७ वर्षीय तरुणाचा जागीच दुर्दैवी मृत्यू झाल्याची घटना घडली आहे. नवल अर्जुन सोनवणे (वय ३७, रा. रामेश्वर कॉलनी) असे मृत तरुणाचे नाव आहे.
नवल सोनवणे हे मेहरूण परिसरातील काम आटोपून दुचाकीने रामेश्वर कॉलनीतील घरी परतत होते. छत्रपती शिवाजी उद्यानाजवळून जात असताना रस्त्याच्या मधोमध असलेल्या अपूर्ण गटारीचा त्यांना अंदाज आला नाही. गटारीवर झाकण किंवा सुरक्षेची कोणतीही व्यवस्था नसल्याने दुचाकी थेट गटारीच्या बांधकामात जाऊन अडकली.
दुचाकी अचानक अडकल्याने नवल हे खाली कोसळले. या वेळी त्यांच्या डोक्याला गंभीर दुखापत झाली. दुखापत इतकी गंभीर होती की त्यांचा घटनास्थळीच मृत्यू झाला. या घटनेने परिसरात खळबळ उडाली.
सूचना फलक नसल्याचा नातेवाईकांचा आरोप
रस्त्याचे काम सुरू असताना नागरिकांच्या सुरक्षेची कोणतीही पुरेशी काळजी घेण्यात आली नसल्याचा आरोप नातेवाईकांनी केला आहे. उघड्या गटारीभोवती सुरक्षा कठडे, बॅरिकेड्स किंवा धोक्याची सूचना देणारा फलक लावण्यात आला नव्हता. गटारीवर योग्य प्रकारे कल्व्हर्ट अथवा झाकण बसविले असते, तर हा अपघात टाळता आला असता, असा संताप नातेवाईकांनी व्यक्त केला.
कुटुंबाचा आधारच हरपला
नवल सोनवणे हे एमआयडीसी परिसरातील एका चटई कंपनीत काम करून कुटुंबाचा उदरनिर्वाह चालवत होते. त्यांच्या पश्चात पत्नी, दोन लहान मुले आणि एक भाऊ असा परिवार आहे. विशेष म्हणजे, त्यांच्या वडिलांचे मागील वर्षी निधन झाले होते. त्यामुळे कुटुंबाची आर्थिक जबाबदारी नवल यांच्यावरच होती.
नवल यांच्या अचानक मृत्यूने सोनवणे कुटुंबावर दुःखाचा डोंगर कोसळला असून, दोन लहान मुलांसह कुटुंबाचा आधार हरपला आहे. दरम्यान, या घटनेची नोंद एमआयडीसी पोलीस ठाण्यात करण्यात आली आहे. रस्त्याचे काम करणाऱ्या संबंधित मक्तेदाराच्या निष्काळजीपणामुळेच हा प्रकार घडल्याचा आरोप करत त्याच्यावर कठोर कारवाई करावी, अशी मागणी नातेवाईकांनी केली आहे.
Discussion about this post