जळगाव/पुणे । मॉन्सूनने महाराष्ट्रातून परतीचा प्रवास सुरू केल्यानंतर जळगावसह राज्यातील अनेक भागांत पुन्हा एकदा उन्हाचा चटका वाढू लागला आहे. जळगावमध्ये दिवसभर कडक ऊन आणि वाढता उकाडा जाणवत असून, ऑक्टोबर हीटचा परिणाम नागरिकांना जाणवू लागला आहे. सकाळच्या वेळी काहीसा गारवा असला तरी दुपारनंतर उन्हाची तीव्रता वाढत आहे.
हवामान विभागाच्या माहितीनुसार, मॉन्सूनने महाराष्ट्राच्या जवळपास निम्म्या भागातून माघार घेतली आहे. येत्या दोन ते तीन दिवसांत मराठवाडा, विदर्भाचा बहुतांश भाग आणि राज्यातील आणखी काही भागांतून मॉन्सून परतण्याची शक्यता आहे. त्यामुळे पावसाळ्याचा शेवटचा टप्पा सुरू झाला असून, राज्यात तापमानाचा पारा हळूहळू वाढण्याची शक्यता आहे.
जळगावमध्ये उन्हाचा चटका वाढणार
मॉन्सूनच्या परतीचा वेग वाढत असताना जळगाव जिल्ह्यात हवामान कोरडे होण्याची शक्यता आहे. दिवसा प्रखर ऊन आणि उकाडा जाणवू शकतो. विशेषतः दुपारच्या वेळेत तापमान वाढल्याने नागरिकांना उन्हाचा त्रास होण्याची शक्यता आहे. सकाळी आणि रात्री तुलनेने वातावरण आल्हाददायक राहू शकते.
दरम्यान, राज्यातील काही भागांत मात्र पावसासाठी पोषक वातावरण तयार झाले आहे. मध्य महाराष्ट्रातील सातारा आणि कोल्हापूर घाटमाथ्यावर तसेच विदर्भातील गडचिरोली जिल्ह्यात काही ठिकाणी विजांच्या कडकडाटासह पावसाचा अंदाज आहे. या भागांसाठी हवामान विभागाने यलो अलर्ट जारी केला आहे.
दुसरीकडे, कोकणातील रायगड, रत्नागिरी आणि सिंधुदुर्ग जिल्ह्यांत उष्ण व दमट हवामान राहण्याची शक्यता आहे. त्यामुळे या भागातील नागरिकांना उकाड्याचा सामना करावा लागू शकतो.
मॉन्सून माघारी फिरत असताना राज्यातील हवामानात वेगाने बदल होत आहेत. जळगावसह उत्तर महाराष्ट्रातील अनेक भागांत आता पावसापेक्षा उन्हाचा प्रभाव वाढण्याची शक्यता असून, नागरिकांनी दुपारच्या वेळेत अनावश्यक उन्हात जाणे टाळावे आणि पुरेसे पाणी प्यावे, असे आवाहन करण्यात येत आहे.
Discussion about this post