बुलढाणा । राज्यात दुष्काळाची दाहकता दिवसेंदिवस अधिकच गडद होत चालली असून, कर्जाच्या आणि नापिकीच्या विळख्यात सापडलेला बळीराजा हताश होऊन टोकाची पावले उचलत असल्याचे पुन्हा एकदा समोर आले आहे. बुलढाणा जिल्ह्यातील संग्रामपूर तालुक्यातील चोंडी टाकळेश्वर गावातून एका अल्पभूधारक शेतकऱ्याने कर्जाचा डोंगर आणि सावकारी तगाद्याला कंटाळून जीवनयात्रा संपवल्याची धक्कादायक घटना घडली आहे. शंकर रामभाऊ भारसाकळे असं आत्महत्या केलेल्या शेतकऱ्याचे नाव आहे. या घटनेमुळे गावात हळहळ व्यक्त होत असून, शेतकरी कुटुंबावर दुःखाचा डोंगर कोसळला आहे.
‘वावर विकूनही कर्ज फिटले नाही…’
जीवन संपवण्यापूर्वी शंकर भारसाकळे यांनी चिठ्ठी लिहून ठेवल्याची माहिती समोर आली आहे. त्यात त्यांनी कर्जबाजारीपणाचा उल्लेख केला आहे. जमिनीचा तुकडा विकून, जमीन गहाण ठेवून तसेच पत्नीचे दागिने गहाण ठेवूनही कर्जाचा प्रश्न सुटला नसल्याचे त्यांनी चिठ्ठीत नमूद केल्याचे सांगण्यात येत आहे.
मंत्र्यांच्या दौऱ्यापूर्वीच दुर्दैवी घटना
महसूल मंत्री चंद्रशेखर बावनकुळे शनिवारी बुलढाणा जिल्ह्यातील दुष्काळी परिस्थितीची पाहणी करण्यासाठी येणार होते. शेतकऱ्यांच्या बांधावर जाऊन त्यांच्या समस्या जाणून घेण्याचा या दौऱ्याचा उद्देश होता. मात्र, त्यांच्या दौऱ्यापूर्वीच ही दुर्दैवी घटना घडली.
शेतकऱ्यांना तातडीच्या मदतीची मागणी
दुष्काळ, पिकांचे नुकसान आणि कर्जबाजारीपणामुळे शेतकऱ्यांवरील आर्थिक संकट वाढत असल्याची भावना ग्रामस्थांकडून व्यक्त होत आहे. या पार्श्वभूमीवर शासनाने दुष्काळग्रस्त शेतकऱ्यांना केवळ कागदोपत्री नव्हे, तर प्रत्यक्ष आणि तातडीने मदत करावी, अशी मागणी होत आहे. दरम्यान, या घटनेची अधिकृत चौकशी आणि संबंधित प्रशासनाकडून पुढील माहिती समोर आल्यानंतर आत्महत्येच्या नेमक्या कारणांबाबत अधिक स्पष्टता होणार आहे.
Discussion about this post