अभिजित दीपकेंची ‘जंतर-मंतर 2.0’ आंदोलनाची घोषणा ; कधी होणार?

मुंबई : कॉकरोच जनता पार्टीचे संस्थापक अध्यक्ष अभिजीत दिपके यांनी मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी आता दिल्लीतील जंतर-मंतरवर आंदोलन करण्याची घोषणा केली आहे. मुंबईतील आंदोलनानंतर दिपके यांनी सोशल मीडियावर पोस्ट करत 10 ऑक्टोबर रोजी ‘जंतर-मंतर 2.0’ आंदोलनाची घोषणा केली आहे.

मुंबईतील दादर येथील छत्रपती शिवाजी महाराज पार्कवर सीजेपीकडून काल आंदोलन करण्यात आले. या आंदोलनाला तरुणांचा मोठा प्रतिसाद मिळाल्याचा दावा दिपके यांनी केला. यावेळी त्यांनी केंद्रीय निवडणूक आयोगाच्या कारभारावर टीका करत ज्ञानेश कुमार यांच्या भूमिकेवरून सरकारवर निशाणा साधला.

10 ऑक्टोबरपर्यंत राजीनाम्याची मागणी

अभिजीत दिपके यांनी ज्ञानेश कुमार यांनी तातडीने आपल्या पदाचा राजीनामा द्यावा, अशी मागणी केली आहे. 10 ऑक्टोबरपर्यंत राजीनामा द्यावा, अशी मुदत त्यांनी दिली असून, त्यानंतर दिल्लीतील जंतर-मंतरकडे मोर्चा काढण्याची घोषणा केली आहे. या आंदोलनाचे स्वरूप नेमके किती दिवसांचे असेल किंवा जंतर-मंतरवर ठिय्या आंदोलन केले जाणार आहे का, याबाबत दिपके यांनी अद्याप स्पष्ट माहिती दिलेली नाही.

धर्मेंद्र प्रधानांविरोधातील आंदोलनानंतर आता दिल्लीकडे मोर्चा

यापूर्वी मे ते जूनदरम्यान दिपके यांनी तत्कालीन केंद्रीय शिक्षण मंत्री धर्मेंद्र प्रधान यांच्या राजीनाम्याच्या मागणीसाठी आंदोलन केले होते. त्यांच्या म्हणण्यानुसार, या आंदोलनाला देशभरातून प्रतिसाद मिळाला होता. आता त्याच धर्तीवर ज्ञानेश कुमार यांच्या राजीनाम्याच्या मागणीसाठी दिल्लीमध्ये आंदोलन उभारण्याची तयारी सुरू करण्यात आली आहे. मुंबईतील आंदोलनादरम्यान दिपके यांनी केंद्रीय निवडणूक आयोगावरही जोरदार टीका केली. त्यांनी निवडणूक आयोगाबाबत “भाजपची एक शेल कंपनी” असल्याची टीका केली.

‘आंदोलन शांततापूर्ण असेल’ – दिपके

जंतर-मंतरवरील आगामी आंदोलनाबाबत दिपके यांनी हे आंदोलन शांततापूर्ण असेल, असे म्हटले आहे. “आम्ही महात्मा गांधी यांच्या रस्त्यावर चालतो,” अशी भूमिका त्यांनी मांडली. तसेच पोलिसांकडून विरोध झाला तरी 10 ऑक्टोबर रोजी दिल्लीतील जंतर-मंतरकडे कूच करण्याचा निर्धार त्यांनी व्यक्त केला आहे.

दरम्यान, ज्ञानेश कुमार यांच्या राजीनाम्याच्या मागणीसाठी जाहीर करण्यात आलेल्या या आंदोलनाकडे आता राजकीय वर्तुळाचे लक्ष लागले आहे. 10 ऑक्टोबर रोजी दिल्लीतील आंदोलनाचे स्वरूप काय असेल, याबाबत उत्सुकता निर्माण झाली आहे.