मुंबई । मुख्य निवडणूक आयुक्त ज्ञानेश कुमार यांच्या नेतृत्वाखालील निवडणूक आयोगाच्या कामकाजावर आक्षेप घेत राज ठाकरे आणि उद्धव ठाकरे ४ ऑक्टोबर रोजी मुंबईत संयुक्त मोर्चा काढणार आहेत. या मोर्चाबाबत ठाकरे बंधूंनी आज संयुक्त पत्रकार परिषद घेत सविस्तर माहिती दिली. मोर्चात कोणत्याही राजकीय पक्षाचे झेंडे न वापरता केवळ तिरंगा हातात घेऊन सहभागी होण्याचे आवाहन करण्यात आले आहे.
मनसे अध्यक्ष राज ठाकरे यांनी पत्रकार परिषदेत सांगितले की, ४ ऑक्टोबर रोजी सकाळी १० वाजता मोर्चाला सुरुवात होईल. भायखळ्यातील रिचर्डसन क्रुडास कंपनीपासून हा मोर्चा सुरू होऊन सीएसएमटी परिसरातील मुंबई महापालिका मुख्यालयापर्यंत जाणार आहे. जेजे उड्डाणपुलावरून मोर्चाचा मार्ग असेल. त्यानंतर मुंबई महापालिका मुख्यालयासमोर सांगता सभा होणार असल्याचे त्यांनी सांगितले.
‘मोर्चात पक्षांचे झेंडे नाहीत, फक्त तिरंगा’
या मोर्चात कोणत्याही राजकीय पक्षाचे झेंडे नसतील, असे राज ठाकरे यांनी स्पष्ट केले. सहभागींच्या हातात केवळ तिरंगा असेल, अशी माहिती त्यांनी दिली. निवडणूक आयोगाच्या कामकाजासंदर्भातील मुद्दे घेऊन हा मोर्चा काढण्यात येणार असल्याचे त्यांनी सांगितले.
सर्व राजकीय पक्षांना निमंत्रण
मोर्चासाठी सर्व राजकीय पक्षांच्या नेत्यांना आमंत्रित करण्यात येणार असल्याचेही राज ठाकरे यांनी सांगितले. फोनद्वारे विविध नेत्यांशी संपर्क साधून त्यांना मोर्चात सहभागी होण्याचे आवाहन केले जाणार आहे. सत्ताधारी पक्षातील नेत्यांनाही मोर्चात सहभागी व्हायचे असल्यास येऊ शकतात, अशी भूमिका त्यांनी मांडली.
दरम्यान, मनसे आणि शिवसेना (उद्धव बाळासाहेब ठाकरे) या दोन्ही पक्षांनी ४ ऑक्टोबरच्या मोर्चासाठी इतर राजकीय पक्षांनाही सहभागी होण्याचे आवाहन केले आहे. या मोर्चाची पार्श्वभूमी निवडणूक आयोगाच्या विशेष सखोल पुनरिक्षण प्रक्रियेवर (SIR) उपस्थित करण्यात आलेले आक्षेप ही आहे.
मोर्चानंतर पुढील दिशा ठरणार
४ ऑक्टोबरच्या मोर्चानंतर पुढील आंदोलनाची दिशा ठरविण्यासाठी दोन्ही नेते चर्चा करणार असल्याचे राज ठाकरे यांनी सांगितले. त्यामुळे या मोर्चानंतर ठाकरे बंधूंची पुढील भूमिका काय असेल, याकडे राजकीय वर्तुळाचे लक्ष लागले आहे.
Discussion about this post