जळगाव : जळगाव जिल्ह्यात गेल्या आठवड्याच्या अखेरीस पावसाने हजेरी लावल्यानंर पुन्हा एकदा पावसाने उघडदीप दिली असून दुसरीकडे जिल्ह्यात उन्हाचा चटका आणि उकाडा जाणवू लागला आहे. दरम्यान, हवामान विभागाने राज्यातील काही भागांत विजांच्या कडकडाटासह हलक्या ते मध्यम पावसाची शक्यता व्यक्त केली. तर उर्वरित राज्यात उघडीप राहून ढगाळ हवामान आणि ऊन-सावल्यांच्या खेळात हलक्या सरी पडण्याची शक्यता आहे.
जळगावात तापमानाचा पारा ३३ अंशांवर
जळगावच्या तापमानात उघडीपेमुळे वाढ झाली आहे. १६ सप्टेंबर रोजी जळगावात कमाल तापमान ३३.७ अंश सेल्सिअस, तर किमान तापमान २१.७ अंश सेल्सिअस नोंदले गेले. या २४ तासांत जळगावात पावसाची नोंद झाली नाही.
आज, १७ सप्टेंबर रोजी जळगावात कमाल तापमान सुमारे ३३ अंश, तर किमान तापमान २२ अंशांच्या आसपास राहण्याचा अंदाज आहे. आकाश सामान्यतः ढगाळ राहून हलक्या पावसाची शक्यता हवामान विभागाने व्यक्त केली आहे. १८ ते २२ सप्टेंबरदरम्यानही कमाल तापमान ३४ ते ३५ अंशांपर्यंत जाण्याची शक्यता असून ढगाळ वातावरणासह हलक्या सरींचा अंदाज आहे.
मध्य महाराष्ट्र, मराठवाड्यात विजांसह पावसाची शक्यता
राज्यातील मध्य महाराष्ट्र आणि मराठवाड्यातील काही जिल्ह्यांमध्ये वातावरणात पुन्हा बदल होण्याची शक्यता आहे. अहिल्यानगर, पुणे, सातारा, सांगली आणि सोलापूर तसेच बीड, धाराशिव, लातूर आणि नांदेड या भागांत तुरळक ठिकाणी विजांच्या कडकडाटासह हलका ते मध्यम पाऊस होऊ शकतो. राज्यातील इतर भागांत मात्र पावसाची उघडीप कायम राहण्याची शक्यता असून, काही ठिकाणी ढगाळ वातावरण आणि ऊन-सावल्यांचा खेळ पाहायला मिळू शकतो.
बंगालच्या उपसागरात पुन्हा हालचाली
दरम्यान, बंगालच्या उपसागरातील हवामान प्रणालीवरही हवामान विभागाचे लक्ष आहे. उत्तर अंदमान समुद्रात कमी दाबाचे क्षेत्र तयार होण्याची शक्यता असून, त्याचा पुढील काळातील पावसावर परिणाम होण्याची शक्यता आहे. ही प्रणाली ओडिशा आणि आंध्र प्रदेशच्या किनारपट्टीकडे सरकत असताना अधिक तीव्र होण्याचे संकेत आहेत. दरम्यान, देशातील अनेक भागांत १७ ते २२ सप्टेंबरदरम्यान पाऊस, वादळी वारे आणि विजांच्या कडकडाटाची शक्यता असल्याचे IMDच्या ताज्या अंदाजात नमूद करण्यात आले आहे.
जळगावकरांना पुन्हा पावसाची प्रतीक्षा
एकीकडे जिल्ह्यात काही दिवसांपासून पावसाने विश्रांती घेतल्याने तापमान वाढत आहे, तर दुसरीकडे शेतकऱ्यांचे लक्ष पुन्हा पावसाकडे लागले आहे. सध्या जळगावात तापमान ३३ अंशांच्या आसपास असून, आगामी काही दिवसांत हलक्या सरींची शक्यता असली तरी मोठ्या पावसासाठी अद्याप प्रतीक्षा कायम आहे.
Discussion about this post