जळगाव । आई माहेरी भावाला राखी बांधण्यासाठी गेली होती, तर वडील मुलगा रोहित आणि मुलीला घेऊन त्यांच्या बहिणीच्या घरी राखी बांधण्यासाठी गेले होते. याचदरम्यान दशरथनगर येथील १७ वर्षीय रोहित साहेबराव धनगर याने राहत्या घरी गळफास घेऊन आत्महत्या केल्याची हृदयद्रावक घटना घडली. ऑनलाइन गेममध्ये पैसे गमावल्याने आलेल्या नैराश्यातून त्याने हे टोकाचे पाऊल उचलल्याची प्राथमिक माहिती समोर आली आहे.
रोहितचे वडील साहेबराव धनगर हे रोहित आणि मुलीला घेऊन मेहरुण परिसरातील त्यांच्या बहिणीच्या घरी राखी बांधण्यासाठी गेले होते. तेथे बहिणीने रोहितच्या हातावर राखी बांधली. त्यानंतर रोहित ‘घरी जातो’ असे सांगून एकटाच दशरथनगरातील घरी परतला. घरी आल्यानंतर त्याने गळफास घेऊन जीवन संपविले.
मेसेज पाहताच मित्रांची धाव
आत्महत्येपूर्वी रोहितने काही मित्रांना मेसेज पाठवून आपण आत्महत्या करीत असल्याचे कळविले. मित्रांनी हे मेसेज पाहताच तातडीने त्याच्या घरी धाव घेतली. मात्र, तोपर्यंत रोहितने गळफास घेतला होता. घटनेची माहिती मिळताच शनिपेठ पोलिस ठाण्याचे उपनिरीक्षक अभिषेक कट्यारे आणि त्यांच्या सहकाऱ्यांनी घटनास्थळी धाव घेतली. रोहितला तातडीने शासकीय वैद्यकीय महाविद्यालय व रुग्णालयात दाखल करण्यात आले. मात्र, डॉक्टरांनी तपासून त्याला मृत घोषित केले.
बहिणीच्या हातून बांधलेली शेवटची राखी
रक्षाबंधनाच्या दिवशी बहिणीच्या हातून राखी बांधून घेतल्यानंतर काही वेळातच रोहितने जीवन संपविल्याने या घटनेने कुटुंबीयांना मोठा धक्का बसला आहे. आत्महत्येपूर्वी त्याने बहिणीसाठी मोबाईलवर स्टेटस ठेवले होते. त्यात ‘हॅपी रक्षाबंधन ताई, आता सगळं तू सांभाळून घे दीदी. मम्मी-पप्पांना कधी एकटे सोडू नको, मी जातो आहे,’ असा भावनिक उल्लेख केला होता. यासोबतच काही हिंदी ओळींचा व्हिडिओही त्याने स्टेटसवर ठेवला.
ऑनलाइन गेममध्ये पैसे गमावल्यामुळे रोहित नैराश्यात असल्याची माहिती प्राथमिक तपासात समोर आली आहे. या कारणातूनच त्याने हे टोकाचे पाऊल उचलले असावे, असा अंदाज व्यक्त करण्यात येत आहे. ऐन रक्षाबंधनाच्या दिवशी घडलेल्या या घटनेने लहान बहिणीसह संपूर्ण धनगर कुटुंबावर दुःखाचा डोंगर कोसळला आहे.
Discussion about this post