नलगोंडा : तेलंगणातील नलगोंडा जिल्ह्यात खासगी शाळेच्या प्राचार्य तथा संचालक रूपा रेड्डी यांच्या राहत्या घरात झालेल्या हत्येचा अखेर उलगडा झाला आहे. या प्रकरणी पोलिसांनी त्याच शाळेतील इयत्ता दहावीच्या दोन अल्पवयीन विद्यार्थ्यांना ताब्यात घेतले आहे. घरात चोरी करण्यासाठी शिरलेल्या या दोन्ही विद्यार्थ्यांनी पकडले जाण्याच्या भीतीने रूपा रेड्डी यांच्यावर चाकूने तब्बल २७ वार करून त्यांची हत्या केल्याचे तपासात समोर आले आहे.
११ ऑगस्ट रोजी रूपा रेड्डी या त्यांच्या घरात एकट्या असताना त्यांची हत्या करण्यात आली. हत्येपूर्वी त्या आपल्या मावशीसोबत फोनवर बोलत होत्या. फोन कट होण्यापूर्वी त्यांनी ‘बाबू’ असा शब्द उच्चारला होता. तेलुगू भाषेत तसेच शाळेतही विद्यार्थ्यांना प्रेमाने ‘बाबू’ असे संबोधले जात असल्याने पोलिसांनी या शब्दाला महत्त्व दिले. या धाग्यावरून पोलिसांनी तपासाची दिशा बदलत शाळेतील विद्यार्थ्यांवर लक्ष केंद्रित केले. तपासादरम्यान दहावीतील दोन विद्यार्थ्यांच्या संशयास्पद हालचाली पोलिसांच्या लक्षात आल्या.
रूपा रेड्डी यांच्या हत्येनंतर दहावीतील हे दोन्ही विद्यार्थी अचानक मोठ्या प्रमाणात पैसे खर्च करू लागले. मित्रांसोबत पार्ट्या करण्यासह महागड्या वस्तू खरेदी केल्याचेही समोर आले.नलगोंडाचे पोलीस अधीक्षक शरत चंद्र पवार यांच्या माहितीनुसार, संशय बळावल्यानंतर पोलिसांनी दोन्ही अल्पवयीन विद्यार्थ्यांना ताब्यात घेतले. चौकशीत एका विद्यार्थ्याकडून १ लाख ५१ हजार रुपये रोख आणि आयफोन जप्त करण्यात आला. विशेष म्हणजे, जप्त केलेल्या नोटांवर मानवी रक्ताचे डाग आढळून आल्याने पोलिसांचा संशय अधिक बळावला आणि हत्येचा पर्दाफाश झाला.
आधीही चोरी करताना आढळला होता विद्यार्थी
तपासात आणखी एक महत्त्वाची बाब समोर आली. हत्येच्या सुमारे १५ दिवस आधी यातील एक विद्यार्थी रूपा रेड्डी यांच्या नजरेत आला होता. शाळेच्या मुख्याध्यापकांसह काही कर्मचाऱ्यांनी त्याला बॅगेत मोबाईल फोन आणि रोख रक्कम घेऊन जाताना पकडले होते. त्यावेळी त्याला समज देण्यात आली होती.यानंतर रूपा रेड्डी यांनी संबंधित विद्यार्थ्याला वसतिगृहातून काढून केवळ नियमित वर्गांना उपस्थित राहण्याची परवानगी देण्याचा निर्णय घेतला होता. या पार्श्वभूमीवर विद्यार्थ्याच्या मनात राग निर्माण झाला होता का, याचाही तपास पोलिसांकडून करण्यात येत आहे.
फी जमा होत असल्याने आखला चोरीचा कट
११ ऑगस्ट रोजी शाळेत विद्यार्थ्यांची फी जमा होत असल्याने प्राचार्यांच्या घरात मोठ्या प्रमाणात रोख रक्कम असू शकते, असा अंदाज दोन्ही विद्यार्थ्यांनी बांधला. त्यानुसार त्यांनी हत्येच्या सुमारे पाच दिवस आधी चोरीचा कट आखल्याचे तपासात समोर आले.
घटनेच्या दिवशी दोन्ही विद्यार्थी रूपा रेड्डी यांच्या घरात शिरले. चोरी करत असताना रूपा यांनी त्यातील एका विद्यार्थ्याला पाहिले. आपली ओळख पटेल आणि चोरीचा भांडाफोड होईल, या भीतीने त्याने रूपा रेड्डी यांच्यावर चाकूने तब्बल २७ वार केले. त्यानंतर सुमारे २ लाख ५० हजार रुपये घेऊन तो घटनास्थळावरून पसार झाला. त्याचा साथीदार घराबाहेर उभा असल्याचे तपासात समोर आले. पोलिसांनी दोन्ही अल्पवयीन विद्यार्थ्यांना ताब्यात घेऊन बाल न्याय मंडळासमोर हजर केले. आता पुढील प्रक्रियेनुसार त्यांची रवानगी बालसुधारगृहात करण्याची प्रक्रिया सुरू आहे. या प्रकरणाचा पुढील तपास पोलिसांकडून सुरू आहे.
Discussion about this post