नवी दिल्ली । ऐन सणासुदीच्या काळात सामान्य नागरिकांना महागाईचा आणखी एक झटका बसला आहे. गेल्या महिनाभरात साखरेच्या दरात सरासरी ६.६ टक्क्यांची वाढ झाली आहे. गेल्या महिन्यात साखरेची सरासरी किंमत ४७.१७ रुपये प्रति किलो होती. आता हा दर वाढून ५०.३० रुपये प्रति किलोवर पोहोचला आहे. गेल्या वर्षाच्या तुलनेत साखरेच्या दरात जवळपास ९ टक्क्यांची वाढ झाली आहे.
श्रावण महिन्यापासून सणासुदीला सुरुवात होते. त्यानंतर गौरी-गणपती, दसरा आणि दिवाळीसारखे मोठे सण आहेत. या काळात साखरेची मागणी मोठ्या प्रमाणात वाढते. मात्र, सणांच्या तोंडावरच साखरेच्या दरात वाढ झाल्याने त्याचा थेट आर्थिक परिणाम ग्राहकांच्या खिशावर होणार आहे.साखरेच्या वाढत्या दरांच्या पार्श्वभूमीवर केंद्र सरकारने मोठा निर्णय घेतला आहे. सणासुदीच्या काळात साखरेची वाढती मागणी लक्षात घेऊन साखरेचे दर स्थिर ठेवण्यासाठी व्यापाऱ्यांच्या साखर साठवणुकीवर मर्यादा लागू करण्यात आल्या आहेत.
सरकारच्या निर्णयानुसार १ ऑगस्ट २०२६ ते ३० नोव्हेंबर २०२६ या कालावधीत साखरेच्या साठेबाजीवर नियंत्रण ठेवण्यासाठी या मर्यादा लागू राहणार आहेत. साखरेचा अनावश्यक साठा करून कृत्रिम टंचाई निर्माण होऊ नये आणि बाजारातील दर नियंत्रणात राहावेत, हा या निर्णयामागील उद्देश आहे.
गेल्या महिनाभरापासून साखरेच्या दरात सातत्याने वाढ होत आहे. सणासुदीच्या काळात मागणी वाढल्याने बाजारातील मागणी आणि पुरवठ्याचे गणित बिघडल्याचे सांगितले जात आहे. काही प्रमुख बाजारपेठांमध्ये साखरेची साठेबाजी झाल्याचा अंदाजही व्यक्त केला जात आहे. वाढती मागणी, पुरवठ्यावरचा दबाव आणि साठेबाजीच्या शक्यतेमुळे साखरेच्या किमतीत वाढ झाली आहे. त्यामुळे ग्राहकांना पुरेशा प्रमाणात साखर उपलब्ध राहावी, वितरण व्यवस्था सुरळीत सुरू राहावी आणि दरांवर नियंत्रण ठेवता यावे, यासाठी सरकारकडून साठेबाजीवर मर्यादा लागू करण्यात आल्या आहेत.
ग्राहकांना दिलासा मिळणार?
सणासुदीच्या काळात साखरेची मागणी मोठ्या प्रमाणात वाढण्याची शक्यता आहे. त्यामुळे बाजारातील साखरेचा पुरवठा सुरळीत ठेवणे हे सरकारसमोर मोठे आव्हान असणार आहे. साठेबाजीवर नियंत्रण आल्यास बाजारातील कृत्रिम टंचाई कमी होऊन साखरेच्या दरवाढीला काही प्रमाणात आळा बसण्याची शक्यता आहे. मात्र, साखरेचे वाढलेले दर पुढील काळात किती नियंत्रणात येतात आणि त्याचा ग्राहकांना प्रत्यक्ष किती फायदा मिळतो, याकडे आता सर्वांचे लक्ष लागले आहे.
Discussion about this post