‘मीच, मीच’ म्हणत किती दिवस चालणार?; गिरीश महाजनांचा नाव न घेता एकनाथ खडसेंवर टोला

जळगाव : जळगाव जिल्ह्यातील राजकारणात मंत्री गिरीश महाजन आणि राष्ट्रवादी काँग्रेसचे ज्येष्ठ नेते एकनाथ खडसे यांच्यातील शाब्दिक चकमक पुन्हा एकदा चर्चेत आली आहे. एका विकासकामांच्या कार्यक्रमात आमदार मंगेश चव्हाण यांचे कौतुक करताना गिरीश महाजन यांनी नाव न घेता एकनाथ खडसे यांच्यावर टीकास्त्र सोडले. त्यांच्या वक्तव्यामुळे जिल्ह्याच्या राजकीय वर्तुळात चर्चांना उधाण आले आहे.

कार्यक्रमात बोलताना मंत्री महाजन यांनी आमदार मंगेश चव्हाण यांच्या विकासकामांचे भरभरून कौतुक केले. “मोठी दूरदृष्टी ठेवून मंगेश चव्हाण यांनी दर्जेदार विकासकामे केली आहेत. त्यांच्या कामाचे कौतुक करण्यासाठी माझ्याकडे शब्द नाहीत. महाराष्ट्रातही एवढ्या दर्जाची कामे क्वचितच पाहायला मिळतील,” असे ते म्हणाले.

यावेळी त्यांनी मंगेश चव्हाण यांना उमेदवारी देतानाचा किस्साही सांगितला. “पहिल्यांदा त्यांना विधानसभेची उमेदवारी देताना मी माझी प्रतिष्ठा पणाला लावली होती. तेव्हा ते चार हजार मतांनी विजयी झाले. मात्र पुढील निवडणुकीत त्यांनी तब्बल ८६ हजार मतांनी विजय मिळवत सर्व अपेक्षा पूर्ण केल्या. आता त्यांनी इथेच न थांबता आमचा सात वेळा निवडून येण्याचा विक्रमही मोडावा. भाजपचा भविष्यातील नेता म्हणून मी त्यांच्याकडे पाहतो,” असे महाजन म्हणाले.

भाषणादरम्यान मंत्री गुलाबराव पाटील यांनाही महाजन यांनी मिश्कील टोला लगावला. “माझं वय सांगत नाही, नाहीतर पुन्हा गुलाबराव पाटील त्यावर टिप्पणी करतील,” असे म्हणताच उपस्थितांमध्ये हशा पिकला. त्यावर गुलाबराव पाटील यांनीही “मी महाजनांपेक्षा लहान आहे,” असे म्हणत हलक्याफुलक्या शैलीत उत्तर दिले.

यानंतर महाजन यांनी नाव न घेता एकनाथ खडसे यांच्यावर निशाणा साधला. “आपणही कुठेतरी थांबलं पाहिजे. स्मशानात जाईपर्यंत ‘मीच, मीच’ म्हणत राहायचं? उठल्या-बसल्या ‘मीच’ असं म्हणणं लोकांना चालणार नाही. भविष्यात जिल्ह्याची जबाबदारी ज्याच्याकडे द्यायची, तो नेता कसा असावा याचं उत्तम उदाहरण म्हणजे आमदार मंगेश चव्हाण आहेत,” असे वक्तव्य त्यांनी केले.

यावेळी महाजन यांनी केंद्र आणि राज्य सरकारच्या योजनांचाही उल्लेख केला. “पंतप्रधान नरेंद्र मोदी यांच्या नेतृत्वाखाली देशाचे चित्र बदलले आहे. सर्वत्र सिमेंटचे रस्ते झाले आहेत. कोणतीही निवडणूक नसतानाही शेतकऱ्यांना कर्जमाफी देऊन सरकारने मोठा आधार दिला,” असेही ते म्हणाले.

महाजन यांच्या या वक्तव्यांमुळे जिल्ह्यातील राजकारण पुन्हा तापण्याची चिन्हे दिसत असून, आता यावर एकनाथ खडसे काय प्रतिक्रिया देतात याकडे राजकीय वर्तुळाचे लक्ष लागले आहे.