Union Bank मध्ये ३९५ पदांसाठी भरती; वार्षिक पॅकेज ₹४७ लाखांपर्यंत मिळेल

बँकिंग क्षेत्रात अधिकारी म्हणून करिअर करण्याची इच्छा असलेल्या तरुणांसाठी आनंदाची बातमी आहे. युनियन बँक ऑफ इंडियाने भरती प्रकल्प २०२६-२७ अंतर्गत स्पेशालिस्ट ऑफिसर (SO), जनरल बँकिंग ऑफिसर (GBO) आणि डोमेन एक्सपर्ट ऑफिसर या विविध पदांसाठी एकूण ३९५ जागांची भरती जाहीर केली आहे. या भरतीसाठी २१ जुलैपासून ऑनलाइन अर्ज प्रक्रिया सुरू झाली असून १० ऑगस्ट २०२६ ही अर्ज करण्याची अंतिम तारीख आहे.

कोणत्या पदांसाठी भरती?

या भरतीमध्ये विविध वरिष्ठ पदांचा समावेश करण्यात आला आहे.

मॅनेजर – १६३ जागा
सिनियर मॅनेजर – १५३ जागा
चीफ मॅनेजर – ५२ जागा
असिस्टंट जनरल मॅनेजर – २० जागा
डेप्युटी जनरल मॅनेजर – ७ जागा

निवड झालेल्या उमेदवारांची नियुक्ती बँकेच्या गरजेनुसार देशभरातील शाखांमध्ये करण्यात येणार आहे.

शैक्षणिक पात्रता: (i) कोणत्याही शाखेतील पदवी/पदव्युत्तर पदवी/BE/B.Tech/CA/MBA/MCA/M.Tech/LLB  (ii) 02 ते 12 वर्षे अनुभव

अर्ज शुल्क आणि वयोमर्यादा

अनुसूचित जाती (SC), अनुसूचित जमाती (ST) आणि दिव्यांग (PwBD) उमेदवारांसाठी ₹१७७ अर्ज शुल्क निश्चित करण्यात आले आहे. इतर सर्व प्रवर्गातील उमेदवारांना ₹१,१८० शुल्क भरावे लागेल.

बहुतेक पदांसाठी किमान वय २२ वर्षे असून, पदानुसार कमाल वयोमर्यादा ३० ते ५० वर्षे आहे. राखीव प्रवर्गातील उमेदवारांना शासन नियमानुसार वयोमर्यादेत सवलत मिळणार आहे.

अशी असेल निवड प्रक्रिया

MMGS-II आणि MMGS-III स्तरावरील पदांसाठी ऑनलाइन परीक्षा घेतली जाईल. त्यानंतर गटचर्चा (GD), वैयक्तिक मुलाखत, कागदपत्र पडताळणी आणि आवश्यक असल्यास वैद्यकीय तपासणी होईल.

SMGS-IV ते TEGS-VI स्तरावरील वरिष्ठ पदांसाठी गटचर्चा, मूल्यांकन आणि मुलाखतीद्वारे उमेदवारांची निवड केली जाईल.

स्पेशालिस्ट ऑफिसर पदांसाठीच्या परीक्षेत व्यावसायिक ज्ञानाला प्राधान्य दिले जाईल, तर जनरल बँकिंग ऑफिसर पदासाठी तर्कशक्ती, संख्यात्मक योग्यता, इंग्रजी भाषा आणि व्यावसायिक ज्ञानावर आधारित प्रश्न विचारले जातील. प्रत्येक चुकीच्या उत्तरासाठी ०.२५ गुणांची निगेटिव्ह मार्किंग लागू असेल.

पगार किती मिळणार?

निवड झालेल्या उमेदवारांना आकर्षक वेतनासह विविध भत्ते मिळणार आहेत.

मॅनेजर – प्रारंभिक वेतन ₹६४,८२०
डेप्युटी जनरल मॅनेजर – वेतनश्रेणी ₹१,५६,५०० पर्यंत

पदानुसार वार्षिक CTC सुमारे ₹२१ लाख ते ₹४७ लाखांपर्यंत असू शकतो. याशिवाय महागाई भत्ता, घरभाडे भत्ता (HRA), वैद्यकीय सुविधा, रजा प्रवास सवलत (LTC) आणि इतर अनेक लाभ दिले जाणार आहेत.

परिवीक्षा कालावधी आणि सर्व्हिस बाँड

निवड झालेल्या उमेदवारांना दोन वर्षांचा परिवीक्षा कालावधी पूर्ण करावा लागेल. तसेच नियुक्तीनंतर तीन वर्षांचा सर्व्हिस बाँड लागू असेल. निर्धारित कालावधीपूर्वी नोकरी सोडल्यास बँकेने ठरविलेली बाँडची रक्कम आणि लागू कर भरावा लागेल.

बँकिंग क्षेत्रात उच्च वेतन आणि स्थिर करिअर शोधणाऱ्या उमेदवारांसाठी ही भरती मोठी संधी मानली जात आहे.