नवी दिल्ली : NEET परीक्षा पेपरफुटी प्रकरणावरून देशभरात सुरू असलेल्या आंदोलनांदरम्यान एक मोठी घडामोड समोर आली आहे. या प्रकरणातील मुख्य संशयित म्हणून चर्चेत असलेल्या संजीव कुमार उर्फ संजीव मुखिया याला केंद्रीय अन्वेषण विभागाने (CBI) क्लिनचिट दिली आहे. तपासादरम्यान त्याचा प्रश्नपत्रिका फुटीच्या कटात थेट किंवा अप्रत्यक्ष सहभाग असल्याचे कोणतेही ठोस पुरावे आढळून न आल्याने त्याच्याविरोधात आरोपपत्र दाखल करण्यात आलेले नाही.
दरम्यान, NEET पेपरफुटीच्या निषेधार्थ दिल्लीतील जंतर-मंतर येथे ‘कॉक्रोच जनता पार्टी’चे संस्थापक अभिजीत दीपके यांच्या नेतृत्वाखाली आंदोलन सुरू असून, देशभरातील विद्यार्थी आणि विविध विरोधी पक्षांनी या आंदोलनाला पाठिंबा दिला आहे.
बिहार पोलिसांनी केला होता संशयित म्हणून समावेश
प्रसिद्ध झालेल्या वृत्तानुसार, २०२४ मध्ये बिहार पोलिसांनी NEET-UG प्रश्नपत्रिका चोरीचा प्रकार उघडकीस आणत गुन्हा दाखल केला होता. यापूर्वीच्या काही पेपरफुटी प्रकरणांमध्ये नाव आल्यामुळे प्राथमिक संशयावरून संजीव मुखियाचा एफआयआरमध्ये समावेश करण्यात आला होता.
CBI च्या सखोल तपासात पुरावेच सापडले नाहीत
प्रकरणाचा तपास नंतर CBI कडे सोपविण्यात आला. तपास यंत्रणेने प्रश्नपत्रिका चोरी, वितरण आणि आर्थिक व्यवहारांची साखळी तपासून संबंधित व्यक्तींची ओळख पटवली. त्यानंतर CBI ने पाटणा येथील न्यायालयात एकूण ४५ आरोपींविरुद्ध आरोपपत्र दाखल केले. मात्र, संजीव मुखियाविरोधात कोणताही पुरावा न मिळाल्याने त्याचे नाव आरोपपत्रात समाविष्ट करण्यात आले नाही.
अटक, चौकशी आणि अखेर जामीन
तपासादरम्यान संजीव मुखिया काही काळ फरार होता. त्यानंतर बिहार पोलिसांनी त्याला अटक केली होती. पुढील चौकशीसाठी CBI ने त्याला कोठडीत घेऊन सखोल तपास केला. मात्र, उपलब्ध पुराव्यांमधून त्याचा पेपरफुटीच्या कटाशी संबंध सिद्ध न झाल्याने त्याच्याविरोधात दोषारोपपत्र दाखल करण्यात आले नाही. पुराव्याअभावी न्यायालयाने त्याला जामीनही मंजूर केला आहे.
दरम्यान, NEET पेपरफुटी प्रकरणावरून देशभरात विद्यार्थ्यांचे आंदोलन सुरूच असून, या प्रकरणातील पुढील घडामोडींवर सर्वांचे लक्ष लागले आहे.
Discussion about this post