जळगाव : जळगाव-छत्रपती संभाजीनगर महामार्गावरील रेमंड चौफुलीजवळ शुक्रवारी सायंकाळी झालेल्या भीषण अपघातात दुचाकीवरील दोन युवक गंभीर जखमी झाले. भरधाव ट्रकने मागून जोरदार धडक दिल्याने हा अपघात घडला.
मिळालेल्या माहितीनुसार, छत्रपती संभाजीनगरहून जळगावकडे येणारा ट्रक (क्रमांक टीएन-47-एक्यू-8403) पुढे प्रवास करणाऱ्या दुचाकीवर भरधाव वेगात आदळला. धडक इतकी भीषण होती की दुचाकीवरील दोन्ही युवक रस्त्यावर फेकले गेले आणि गंभीर जखमी झाले.
या अपघातात शेखर ईश्वर सपकाळे (वय २५, रा. धामणगाव, ता. जळगाव) आणि पीयूष प्रदीप बेंडाळे (वय २०, रा. अयोध्या नगर, जळगाव) हे गंभीर जखमी झाले आहेत.
अपघातानंतर घटनास्थळी नागरिकांनी तत्काळ धाव घेत जखमींना मदत केली. त्यानंतर दोघांनाही उपचारासाठी शासकीय वैद्यकीय महाविद्यालय व रुग्णालय, जळगाव येथे दाखल करण्यात आले असून त्यांच्यावर उपचार सुरू आहेत.
या अपघातामुळे काही काळ महामार्गावरील वाहतूक विस्कळीत झाली होती. घटनेची माहिती मिळताच पोलिसांनी घटनास्थळी धाव घेत वाहतूक सुरळीत केली. अपघाताबाबत पुढील तपास सुरू आहे.
Discussion about this post