जळगाव । जळगाव जिल्ह्यातील चोपडा शहरात दूधाच्या गुणवत्तेबाबत प्रश्नचिन्ह निर्माण करणारी घटना समोर आली आहे. एका खासगी दूध डेअरीतून खरेदी केलेले दूध तापवल्यानंतर त्याचा पोत आणि स्वरूप अनपेक्षितपणे बदलल्याचा दावा ग्राहकाने केला आहे. या घटनेचा व्हिडिओ सोशल मीडियावर व्हायरल झाल्यानंतर नागरिकांमध्ये चर्चेला उधाण आले असून संबंधित दूधाची प्रयोगशाळेत तपासणी करण्याची मागणी करण्यात येत आहे.
चोपडा येथील माजी सैनिक धनराज बाविस्कर यांनी शहरातील एका खासगी डेअरीमधून दूध खरेदी केले होते. त्यांनी घरी दूध उकळण्यासाठी ठेवले असता, ते नेहमीप्रमाणे घट्ट न होता चिकट आणि लवचिक स्वरूपाचे झाल्याचे त्यांच्या लक्षात आले. त्यांनी हा संपूर्ण प्रकार मोबाईलमध्ये चित्रित केला.
व्हायरल झालेल्या व्हिडिओमध्ये चमच्याने दूध उचलल्यानंतर ते लांबपर्यंत ताणले जात असल्याचे दिसून येते. हा व्हिडिओ सोशल मीडियावर मोठ्या प्रमाणात शेअर झाल्यानंतर अनेकांनी दूधाच्या गुणवत्तेबाबत चिंता व्यक्त केली. काहींनी संबंधित डेअरीची चौकशी करण्याची मागणी केली, तर काहींनी दूधाची वैज्ञानिक तपासणी करून वस्तुस्थिती समोर आणण्याची गरज व्यक्त केली.
धनराज बाविस्कर यांनी अन्न व औषध प्रशासनाकडे दूरध्वनीद्वारे तक्रार नोंदविल्याचे सांगितले. संबंधित दूधाचे नमुने तातडीने जप्त करून अधिकृत प्रयोगशाळेत तपासणीसाठी पाठवावेत आणि त्यामध्ये कोणत्याही प्रकारची भेसळ किंवा अन्य पदार्थ मिसळले आहेत का, याचा अहवाल जाहीर करावा, अशी त्यांची मागणी आहे.
दरम्यान, राज्यभर दूध भेसळीविरोधात कारवाई सुरू असताना ही घटना समोर आल्याने नागरिकांचे लक्ष या प्रकरणाकडे लागले आहे. मात्र, या दूधामध्ये भेसळ झाल्याचे किंवा कोणताही रासायनिक पदार्थ मिसळल्याचे अद्याप अधिकृतपणे सिद्ध झालेले नाही. तपासणी अहवाल आल्यानंतरच दूधाच्या स्वरूपात बदल होण्यामागील नेमके कारण स्पष्ट होणार असल्याचे संबंधित अधिकाऱ्यांनी सांगितले आहे.
प्रशासनाकडून तपासणीची प्रक्रिया पूर्ण होईपर्यंत कोणताही निष्कर्ष काढू नये, तसेच नागरिकांनी अफवांवर विश्वास न ठेवता अधिकृत अहवालाची प्रतीक्षा करावी, असे आवाहनही करण्यात येत आहे.
Discussion about this post