जळगाव । जळगाव शहरातील गणेशवाडी परिसरात आज बुधवारी (२४ जून) सायंकाळी पाच वाजेच्या सुमारास एक अत्यंत थरारक आणि धक्कादायक दुर्घटना घडली. घरा आवारातील बंदिस्त विहिरीची मोटार काढत असताना सिमेंटची धाप अचानक तुटल्याने ९१ वर्षीय आजोबा, त्यांचा २२ वर्षांचा नातू आणि एक शेजारी तरुण असे तिघेजण थेट ५० फूट खोल विहिरीत कोसळले. या घटनेमुळे परिसरात एकच धावपळ आणि खळबळ उडाली. जळगाव महानगरपालिकेच्या अग्निशमन दलाने तात्काळ धाव घेत अथक परिश्रमानंतर तिघांनाही विहिरीतून सुखरूप बाहेर काढले.
मिळालेल्या माहितीनुसार, गणेशवाडी भागात राहणारे रामलाल हिरामण भावसार (वय ९१) यांच्या घराच्या आवारात ५० फूट खोल लहान घरगुती विहीर आहे. या विहिरीवर सिमेंटच्या धापा (सिमेंटचे कव्हर) टाकून ती बंदिस्त करण्यात आली होती. आज बुधवारी सायंकाळी रामलाल भावसार, त्यांचा नातू सिद्धेश महेंद्र भावसार (वय २२) आणि शेजारी राहणारा तरुण देवेंद्र राजेंद्र खाचणे (वय २२) हे तिघे विहिरीतील इलेक्ट्रिक मोटार बाहेर काढण्याचे काम करत होते. मोटार ओढत असताना सिमेंटच्या धापेवर अचानक वजन वाढल्याने ती मधोमध तुटली आणि क्षणार्धात तिघेही थेट ५० फूट खोल विहिरीत कोसळले.
या दुर्घटनेची माहिती मिळताच परिसरातील नागरिकांनी विहिरीकडे धाव घेतली. घटनेचे गांभीर्य ओळखून जळगाव महानगरपालिकेच्या अग्निशमन दलाच्या पथकाला पाचारण करण्यात आले. अग्निशमन दलाच्या जवानांनी जीवाची बाजी लावत दोरखंड आणि शिडीच्या सहाय्याने विहिरीत उतरून बचावकार्य सुरू केले. जवानांनी अथक परिश्रम करून विहिरीत पडलेल्या तिघांनाही सुखरूप बाहेर काढले.
या भीषण घटनेत आजोबा रामलाल भावसार (वय ९१) आणि नातू सिद्धेश भावसार (वय २२) हे दोघे गंभीर जखमी झाले आहेत. त्यांना तातडीने शहरातील एका खाजगी रुग्णालयात उपचारासाठी दाखल करण्यात आले आहे. तर शेजारी राहणारा तरुण देवेंद्र खाचणे हा सुदैवाने किरकोळ जखमी झाला आहे.
घटनेची माहिती मिळताच जळगाव महानगरपालिकेच्या महापौर दीपमाला काळे यांनी तातडीने घटनास्थळी भेट देऊन मदतकार्याची पाहणी केली. जखमींच्या प्रकृतीची विचारपूस केल्यानंतर त्यांनी महापालिका प्रशासनाला महत्त्वाचे आदेश दिले. जळगाव शहरातील अशा प्रकारे बंदिस्त केलेल्या (वर गाळा किंवा धापा टाकलेल्या) सर्व विहिरींची तात्काळ चौकशी करून घरमालकांना नोटिसा बजावण्याचे आदेश महापौर दीपमाला काळे यांनी दिले आहेत, जेणेकरून भविष्यात अशा दुर्घटना टाळता येतील.
Discussion about this post