उत्तर प्रदेशची राजधानी लखनऊ येथे सोमवारी एक मोठी दुर्घटना घडली. अलीगंज परिसरातील पुरनिया चौकाजवळ असलेल्या एका कोचिंग संस्थेला अचानक भीषण आग लागल्याने परिसरात एकच खळबळ उडाली. आग लागल्यानंतर जीव वाचवण्यासाठी काही विद्यार्थ्यांनी थेट इमारतीच्या वरच्या मजल्यावरून उड्या मारल्याची धक्कादायक घटना घडली.
प्राथमिक माहितीनुसार, दुर्घटनेच्या वेळी कोचिंग सेंटरमध्ये मोठ्या संख्येने विद्यार्थी उपस्थित होते. आगीमुळे काही क्षणांतच संपूर्ण इमारतीत धुराचे साम्राज्य पसरले. त्यामुळे विद्यार्थ्यांमध्ये घबराट निर्माण झाली आणि बाहेर पडण्यासाठी एकच धावपळ उडाली. काही विद्यार्थ्यांनी जीवाची पर्वा न करता इमारतीवरून उड्या मारून स्वतःचा बचाव केला.
स्थानिक नागरिकांनी तातडीने अग्निशमन विभागाला माहिती दिल्यानंतर मोठ्या प्रमाणावर बचावकार्य सुरू करण्यात आले. अग्निशमन दलाच्या तब्बल १४ गाड्या आणि विशेष हायड्रॉलिक प्लॅटफॉर्मच्या मदतीने आग आटोक्यात आणण्याचे प्रयत्न सुरू आहेत. अद्याप काही विद्यार्थी इमारतीत अडकल्याची शक्यता व्यक्त करण्यात येत असून शोध आणि बचाव मोहीम युद्धपातळीवर राबविण्यात येत आहे.
घटनेची माहिती मिळताच वरिष्ठ प्रशासकीय अधिकारी, पोलीस अधिकारी आणि स्थानिक प्रशासनाने घटनास्थळी धाव घेतली. जखमी विद्यार्थ्यांना तातडीने उपचारासाठी रुग्णालयात दाखल करण्यात आले आहे.
दरम्यान, उत्तर प्रदेशचे मुख्यमंत्री योगी आदित्यनाथ यांनी या घटनेची गंभीर दखल घेतली असून अधिकाऱ्यांना त्वरित मदत आणि बचावकार्य गतीमान करण्याचे निर्देश दिले आहेत. जखमी विद्यार्थ्यांना सर्वोत्तम वैद्यकीय सुविधा उपलब्ध करून देण्याचे आदेशही त्यांनी प्रशासनाला दिले आहेत. या घटनेमुळे लखनऊ शहरात हळहळ व्यक्त होत असून कोचिंग संस्थांमधील अग्निसुरक्षा व्यवस्थेवर पुन्हा एकदा प्रश्नचिन्ह उपस्थित झाले आहे.
Discussion about this post