जळगाव : विद्यार्थ्यांनी जमा केलेले शुल्क तसेच संस्थेच्या नावे आलेले धनादेश संस्थेच्या बँक खात्यात जमा न करता, ते स्वतःच्या फायद्यासाठी वापरुन शैक्षणिक संस्थेच्या लेखापालाने ४ कोटी ८५ लाख ३ हजार ५८२ रुपयांचा अपहार केल्याचा प्रकार धक्कादायक प्रकार समोर आला आहे. याप्रकरणी श्रीकृष्ण शैक्षणिक व सांस्कृतिक मंडळ या संस्थेच्या शिरसोली रोडवरील महाविद्यालयाचा लेखापाल लोकेश उर्फ चेतन गणेश कोल्हे (रा.नशिराबाद) याच्याविरुद्ध एमआयडीसी पोलिस ठाण्यात गुन्हा दाखल करण्यात आला आहे. या कारवाईने संबंधित शिक्षण संस्थेत खळबळ उडाली.
माजी मंत्री गुलाबराव देवकर यांच्या श्रीकृष्ण शैक्षणिक व सांस्कृतिक मंडळांच्या संस्थेत लोकेश कोल्हे हा लेखापाल म्हणून नोकरीस होता. त्याने १ ऑगस्ट २०२० ते ३१ मे २०२३ दरम्यान संस्थेच्या महाविद्यालयांमध्ये विद्यार्थ्यांनी शुल्का पोटी भरलेली रक्कम आणि संस्थेच्या नावाने आलेले धनादेश वटवून ही रक्कम संस्थेच्या खात्यात जमा न करता ती स्वतः वापरली. हा प्रकार उघडकीस आल्यानंतर माजी मंत्री गुलाबराव देवकर यांच्या फिर्यादीवरून एमआयडीसी पोलीस ठाण्यात गुन्हा क्रमांक ५४६/२०२६ दाखल करण्यात आला आहे.
आरोपीविरुद्ध भारतीय न्याय संहितेच्या (BNS) अंतर्गत फसवणूक, विश्वासघात, बनावट कागदपत्रे तयार करणे आणि त्यांचा वापर करणे या संबंधित कलमांनुसार गुन्हा नोंदवण्यात आला आहे.या प्रकरणाचा पुढील तपास आर्थिक गुन्हे शाखेच्या मदतीने एमआयडीसी पोलीस करीत आहेत. दरम्यान, आरोपी लोकेश कोल्हे याला अद्याप अटक करण्यात आलेली नसून पोलीस त्याचा शोध घेत आहेत.
Discussion about this post