नीट-यूजी २०२६ पुनर्परीक्षेच्या पार्श्वभूमीवर केंद्र सरकारने परीक्षा प्रक्रियेत कोणताही गैरप्रकार होऊ नये यासाठी कडक पावले उचलली आहेत. गेल्या महिन्यात समोर आलेल्या पेपरफुटी प्रकरणानंतर यंदाची परीक्षा पूर्णपणे पारदर्शक आणि सुरक्षित वातावरणात पार पडावी, यासाठी सुरक्षा व्यवस्था अधिक मजबूत करण्यात आली आहे.
२१ जून रोजी होणाऱ्या NEET-UG २०२६ परीक्षेसाठी देशभरातील परीक्षा केंद्रांवर कडेकोट बंदोबस्त ठेवण्यात आला असून, सायबर माध्यमातून होणाऱ्या गैरप्रकारांवरही विशेष लक्ष ठेवले जात आहे. सरकारने परीक्षेदरम्यान प्रश्नपत्रिकेबाबत अफवा आणि फसवणूक रोखण्यासाठी टेलिग्रामवरील निर्बंधांसह काही विशेष उपाययोजना लागू केल्या आहेत. उपलब्ध माहितीनुसार, भारतात टेलिग्रामवरील प्रवेश तात्पुरता २२ जूनपर्यंत मर्यादित करण्यात आला असून, संदेश संपादन (message editing) सुविधेवर ३० जूनपर्यंत निर्बंध घालण्यात आले आहेत.
यापूर्वी नीट पेपरफुटी प्रकरणात काही अधिकारी आणि शिक्षकांची नावे समोर आल्यानंतर परीक्षा व्यवस्थेवर प्रश्नचिन्ह उपस्थित झाले होते. त्यानंतर केंद्र सरकार आणि राष्ट्रीय परीक्षा संस्था (NTA) यांनी परीक्षा प्रक्रियेत कोणतीही त्रुटी राहू नये म्हणून अनेक सुरक्षा उपाय लागू केले आहेत.
दरम्यान, कठोर सुरक्षा व्यवस्था आणि डिजिटल देखरेखीच्या पार्श्वभूमीवर यंदाची नीट परीक्षा कोणत्याही वादाशिवाय पार पडते का, याकडे देशभरातील लाखो विद्यार्थी आणि पालकांचे लक्ष लागले आहे.
Discussion about this post