भुसावळ । भुसावळ तालुक्यातील तपत कठोरा गावाजवळील पिंप्रीसेकम शिवार रस्त्यावर झालेल्या भीषण अपघातात डंपरच्या धडकेत ५५ वर्षीय वृद्धाचा जागीच मृत्यू झाला, तर त्यांच्या चार वर्षीय नातीने थोडक्यात मृत्यूच्या दाढेतून सुटका केली. या दुर्घटनेनंतर संतप्त ग्रामस्थांनी संबंधित डंपरला आग लावत आपला रोष व्यक्त केला. या प्रकरणी वरणगाव पोलिस ठाण्यात गुन्हा दाखल करण्यात आला आहे.
मृत व्यक्तीचे नाव आनंदा मुकुंद पाटील (वय ५५, रा. तपत कठोरा) असे आहे. ते आपल्या चार वर्षीय नात परी हिच्यासोबत दुचाकीवरून पिंप्रीसेकम शिवारातील शेतातून घरी परतत होते. त्याचवेळी रस्त्यावरील कामासाठी गिट्टी वाहून नेणारा डंपर (एमएच १९ ईयू ३७३७) अरुंद रस्त्यावर मागे घेत असताना दुचाकीला जोरदार धडक बसली.
या भीषण धडकेत आनंदा पाटील हे डंपरखाली चिरडले गेले आणि त्यांचा जागीच मृत्यू झाला. मात्र त्यांच्या शेजारी बसलेली लहान नात परी सुदैवाने थोडक्यात बचावली. अपघातानंतर परिसरात एकच खळबळ उडाली.
घटनेची माहिती मिळताच ग्रामस्थांनी घटनास्थळी धाव घेत डंपरखाली अडकलेली दुचाकी आणि मृतदेह बाहेर काढला. त्यानंतर आनंदा पाटील यांना वरणगाव ग्रामीण रुग्णालयात नेण्यात आले. मात्र वैद्यकीय अधिकाऱ्यांनी तपासणीनंतर त्यांना मृत घोषित केले.
या दुर्दैवी घटनेमुळे गावात संतापाची लाट उसळली. संतप्त ग्रामस्थांनी अपघातास कारणीभूत ठरलेल्या डंपरला आग लावून पेटवून दिला. त्यामुळे परिसरात काही काळ तणावपूर्ण वातावरण निर्माण झाले होते. नगरपरिषदेच्या अग्निशमन दलाने घटनास्थळी धाव घेत आगीवर नियंत्रण मिळवले. दरम्यान, या संपूर्ण प्रकरणी वरणगाव पोलिस ठाण्यात गुन्हा दाखल करण्यात आला असून पुढील तपास सुरू आहे.
Discussion about this post