जळगाव अमळनेर-धुळे महामार्गावरील मंगरूळ गावाजवळील हॉटेल वृंदावन परिसरात आज सकाळी साडेसातच्या सुमारास भीषण तिहेरी अपघात घडून संपूर्ण परिसर हादरला. एसटी बस, कार आणि दुचाकी यांच्यात झालेल्या या अपघातात सहा जणांचा जागीच मृत्यू झाला असून अनेक जण गंभीर जखमी झाले आहेत. काही जखमींची प्रकृती चिंताजनक असल्याने मृतांचा आकडा वाढण्याची शक्यता व्यक्त केली जात आहे.
प्राथमिक माहितीनुसार, अमळनेरहून धुळ्याकडे जाणारी एसटी बस, कार आणि दुचाकी रस्त्यावरून प्रवास करत असताना समोरून भरधाव वेगाने येणाऱ्या गुजरात क्रमांकाच्या कारने अचानक नियंत्रण गमावत समोरासमोर जोरदार धडक दिली. या धडकेचा वेग इतका प्रचंड होता की दुचाकीचा अक्षरशः चुराडा झाला, तर कारचा पुढील भाग पूर्णपणे उद्ध्वस्त झाला.
या भीषण अपघातात दुचाकीस्वारासह कारमधील प्रवाशांचा जागीच मृत्यू झाला. अपघातानंतर कारमध्ये एक चिमुकला अडकून पडल्याने काही काळ तणावाचे वातावरण निर्माण झाले होते. स्थानिक नागरिक, पोलीस आणि एसटी कर्मचाऱ्यांनी तत्काळ मदतकार्य सुरू करत जखमींना बाहेर काढले आणि रुग्णालयात हलवले.
गंभीर जखमींवर जवळच्या रुग्णालयात उपचार सुरू असून काहींना पुढील उपचारासाठी गुजरातमधील व्यारा येथील रुग्णालयात पाठविण्यात आले आहे. मृतदेह शवविच्छेदनासाठी ग्रामीण रुग्णालयात हलवण्यात आले असून पोलीस अपघाताचे नेमके कारण शोधण्यासाठी पुढील तपास करत आहेत.
या भीषण दुर्घटनेमुळे अमळनेर-धुळे मार्गावर काही काळ वाहतूक विस्कळीत झाली होती. घटनास्थळी नागरिकांची मोठी गर्दी झाली असून परिसरात हळहळ व्यक्त केली जात आहे.
Discussion about this post