१५ नगरसेवक असूनही धरणगावचा नगराध्यक्ष कसा पडला? गुलाबराव पाटलांचा खळबळजनक खुलासा

जळगाव । जळगाव जिल्ह्यात शिवसेनेचा पहिला नगराध्यक्ष देणारा तालुका म्हणून धरणगावची ऐतिहासिक ओळख आहे. या बालेकिल्ल्यात आपले तब्बल १५ नगरसेवक निवडून आले, तरीही नगराध्यक्ष पदाची मुख्य जागा आपल्या हातातून निसटली… हे मनाला टोचणारे आहे,” अशा शब्दांत राज्याचे पाणीपुरवठा व स्वच्छता मंत्री गुलाबराव पाटील यांनी आपल्या मनातील तीव्र खंत जाहीरपणे बोलून दाखवली.

अमळनेर येथे खासदार श्रीकांत शिंदे यांच्या प्रमुख उपस्थितीत जळगाव ग्रामीण मतदारसंघाची महत्त्वाची राजकीय आढावा बैठक पार पडली. या बैठकीत आगामी निवडणुकांच्या रणनीतीवर चर्चा सुरू असताना, आपल्याच बालेकिल्ल्यात झालेल्या अंतर्गत दगाबाजीवर बोलताना गुलाबराव पाटील कमालीचे भावूक झाले होते.

१५ नगरसेवक असूनही नगराध्यक्ष पराभूत; ‘क्रॉस व्होटिंग’चे शल्य कायम

धरणगाव नगरपरिषदेवर अनेक वर्षे शिवसेनेने आपले निर्विवाद वर्चस्व राखले आहे. नुकत्याच झालेल्या निवडणुकीत पक्षाचे १५ नगरसेवक बहुमताने निवडून आले होते, तर प्रतिस्पर्धी शहर विकास आघाडीकडे केवळ ८ नगरसेवक होते. एवढे भक्कम संख्याबळ आणि अनुकूल वातावरण असतानाही शिवसेनेचा नगराध्यक्ष पदाचा उमेदवार पराभूत झाला. या पराभवामुळे पक्षात अंतर्गत ‘क्रॉस व्होटिंग’ (बंडखोरी) झाल्याचे उघड झाले होते. याच अंतर्गत राजकारणाचे शल्य आजही गुलाबराव पाटील यांच्या मनात कायम असल्याचे या बैठकीत दिसून आले.

आपल्या कार्यकर्त्यांना आत्मपरीक्षण करण्याचा सल्ला देताना गुलाबराव पाटील यांनी जिल्ह्यातील इतर ठिकाणच्या निकालांचे दाखले दिले. ते म्हणाले: “शेजारच्या नशिराबादमध्ये महायुतीमधील भाजपचा नगराध्यक्ष सहज निवडून येतो; मग एवढी मोठी ताकद असताना धरणगावमध्ये आपला नगराध्यक्ष का पडतो? एवढेच नाही, तर जळगाव जिल्ह्यातील शेतकऱ्यांची आणि व्यापाऱ्यांची आर्थिक नाडी समजली जाणारी ‘जळगाव कृषी उत्पन्न बाजार समिती’ देखील यावेळी आपल्या हातातून निसटली असून तिथे आपल्याला पराभव स्वीकारावा लागला आहे.”

आपल्याच बालेकिल्ल्यात झालेल्या या राजकीय पीछेहाटीचा प्रामाणिक आढावा घेत गुलाबराव पाटील यांनी शिवसैनिकांना आगामी निवडणुकांसाठी सज्ज होण्याचे आवाहन केले. “झालेल्या चुकांमधून धडा घ्या, अंतर्गत मतभेद गाडून टाका आणि आगामी विधानसभा तसेच स्थानिक स्वराज्य संस्थांच्या निवडणुकांमध्ये पूर्ण एकजुटीने आणि ताकतीने मैदानावर उतरा,” अशी साद त्यांनी कार्यकर्त्यांना घातली.

या हायव्होल्टेज आढावा बैठकीला खासदार श्रीकांत शिंदे यांच्यासह जळगाव जिल्ह्यातील शिवसेनेचे प्रमुख पदाधिकारी, माजी लोकप्रतिनिधी आणि कार्यकर्ते मोठ्या संख्येने उपस्थित होते.