जळगाव । गुंतवणुकीवर दरमहा अवाढव्य परताव्याचे आमिष दाखवून तब्बल २७९ गुंतवणूकदारांची २३ कोटी ८१ लाख ७२ हजार ५३० रुपयांची फसवणूक करणाऱ्या ‘टीडब्ल्यूजे असोसिएट्स प्रा. लि. पुणे’ कंपनीच्या जळगावमधील मोठ्या घोटाळ्याचा आर्थिक गुन्हे शाखेने भांडाफोड केला आहे. याप्रकरणी जिल्हापेठ पोलीस ठाण्यात गुन्हा दाखल करण्यात आला असून, कंपनीचा जळगाव शाखेचा मुख्य फ्रँचायझी प्रमुख आणि एजंट मिलिंद शालिकराव पाटील (वय ४१, रा. शिव कॉलनी, जळगाव) याला पोलिसांनी शिताफीने अटक केली आहे.
आर्थिक गुन्हे शाखेच्या तपासात अत्यंत धक्कादायक बाब समोर आली आहे. संशयित आरोपी मिलिंद पाटील याने पोलिसांचा आपल्यावर संशय येऊ नये म्हणून सुरुवातीला स्वतःच कंपनीच्या संचालकांविरुद्ध एक तक्रार अर्ज दिला होता. मात्र, पोलीस अधीक्षक श्रीकांत धिवरे यांच्या मार्गदर्शनाखाली जेव्हा खात्याने कसून तपास केला, तेव्हा मिलिंद पाटील हाच जळगाव फ्रँचायझीचा मुख्य सूत्रधार असल्याचे समोर आले. तो थेट गुंतवणूकदारांकडून पैसे स्वीकारत होता, त्यांना बनावट करारनामे करून देत होता आणि या बदल्यात त्याला कंपनीकडून लाखो रुपयांचे कमिशन मिळत होते.
पाच वर्षांत विणले फसवणुकीचे जाळे
डिसेंबर २०२० ते सप्टेंबर २०२५ या पाच वर्षांच्या काळात जळगाव शहर आणि परिसरात मोठमोठे सेमिनार, आलिशान बैठका घेऊन नागरिकांना जाळ्यात ओढण्यात आले. शेअर मार्केट ट्रेडिंगच्या नावाखाली सेबी (SEBI) च्या सर्व नियमांचे उल्लंघन करून बेकायदेशीर ठेव योजना चालवण्यात आली. लोकांचा विश्वास संपादन करण्यासाठी वाढीव नफ्याचे खोटे सादरीकरण केले जात होते. या भुलथापांना बळी पडून सेवानिवृत्त कर्मचारी, सामान्य नागरिक आणि शेतकऱ्यांनी कर्ज काढून कोट्यवधी रुपयांची गुंतवणूक केली.
पोलिसांनी तपासादरम्यान अनेक आर्थिक व्यवहार, बँक खात्यांतील हालचाली, करारपत्रे आणि गुंतवणूकदारांचे निवेदन तपासले. त्यातून मिलिंद पाटीलचा सक्रिय सहभाग स्पष्ट झाल्यानंतर त्याला अटक करण्यात आली. पोलिसांनी त्याच्या आर्थिक व्यवहारांचीही चौकशी सुरू केली असून या घोटाळ्यात आणखी काही एजंट आणि सहकारी सहभागी असल्याचा संशय व्यक्त केला जात आहे.
Discussion about this post