जळगाव । जिल्ह्यातील महसूल विभागातील भ्रष्टाचाराचा आणखी एक प्रकार समोर आला असून, अवैध उत्खननाच्या तक्रारीची चौकशी बंद करण्यासाठी लाच स्वीकारताना मंडळ अधिकारी आणि त्याच्या साथीदाराला लाचलुचपत प्रतिबंधक विभागाने रंगेहाथ पकडले. या कारवाईमुळे महसूल विभागात एकच खळबळ उडाली आहे.
मिळालेल्या माहितीनुसार, एका शेतकऱ्याविरोधात अवैध खोदकामाची तक्रार करण्यात आली होती. या प्रकरणाची चौकशी संबंधित मंडळ अधिकाऱ्याकडे होती. चौकशी अनुकूल करून देण्यासाठी आणि प्रकरण दाबण्यासाठी संबंधित अधिकाऱ्याने मोठ्या रकमेची मागणी केल्याचा आरोप आहे. यानंतर तक्रारदाराने थेट लाचलुचपत प्रतिबंधक विभागाकडे धाव घेतली.
तक्रारीची पडताळणी केल्यानंतर एसीबीने सापळा रचला. मंगळवारी दुपारी पिंप्राळा परिसरातील तलाठी कार्यालयाजवळ खासगी व्यक्तीमार्फत लाचेची रक्कम स्वीकारली जात असताना पथकाने दोघांनाही ताब्यात घेतले. कारवाईदरम्यान संपूर्ण व्यवहाराची नोंद करण्यात आली असून, आरोपींविरोधात भ्रष्टाचार प्रतिबंधक कायद्यान्वये गुन्हा दाखल करण्याची प्रक्रिया सुरू करण्यात आली आहे.
या प्रकरणानंतर जिल्ह्यातील महसूल विभागाच्या कामकाजावर प्रश्नचिन्ह उपस्थित केले जात आहे. विशेष म्हणजे, गेल्या काही महिन्यांत जळगाव जिल्ह्यातील भ्रष्टाचाराच्या तक्रारींसाठी नागरिक बाहेरील एसीबी पथकांकडे अधिक प्रमाणात जात असल्याची चर्चा प्रशासन वर्तुळात सुरू आहे.
दरम्यान, या कारवाईमुळे महसूल विभागातील इतर अधिकाऱ्यांमध्येही खळबळ उडाली असून, एसीबीकडून पुढील तपास सुरू आहे.
Discussion about this post