पारोळा । शहराजवळील म्हसवे शिवार परिसरात धोकादायक रसायनांचा अवैध साठा सुरू असल्याचा प्रकार उघडकीस आल्यानंतर पोलिसांनी मोठी कारवाई करत लाखो रुपयांचा मुद्देमाल जप्त केला आहे. राष्ट्रीय महामार्गालगत सुरू असलेल्या या प्रकारामुळे परिसरात मोठी खळबळ उडाली असून, योग्य वेळी कारवाई झाल्याने संभाव्य मोठा अपघात टळल्याची चर्चा सुरू आहे.
पोलिसांना गुप्त माहिती मिळाल्यानंतर विशेष पथकाने संशयित ठिकाणी छापा टाकला. या वेळी मोठ्या प्रमाणात रसायनयुक्त पदार्थ, टँकर आणि साठवणूक साहित्य आढळून आले. प्राथमिक तपासात संबंधित रसायनाची साठवण कोणतीही आवश्यक सुरक्षा व्यवस्था न करता करण्यात येत असल्याचे समोर आले आहे. त्यामुळे नागरिकांच्या जीवितास धोका निर्माण होण्याची शक्यता व्यक्त करण्यात येत आहे.
कारवाईदरम्यान पोलिसांनी एक १२ चाकी टँकर, हजारो लिटर रसायनयुक्त द्रव्य, जमिनीवरील मोठी टाकी, मोटारसायकल आणि इतर साहित्य जप्त केले. या संपूर्ण मुद्देमालाची किंमत सुमारे ९ लाख रुपयांपेक्षा अधिक असल्याचे सांगण्यात येत आहे.
दरम्यान, या प्रकरणी एका संशयिताविरुद्ध पारोळा पोलीस स्टेशन येथे गुन्हा दाखल करण्यात आला असून, या रसायनांचा पुरवठा नेमका कुठून होत होता आणि त्याची विक्री कुठे केली जाणार होती याचा तपास सुरू आहे. पोलिसांकडून या प्रकरणातील इतर संबंधितांचा शोधही घेतला जात आहे.
Discussion about this post