महाराष्ट्रातील या बँकेत कोट्यवधी रुपयांचा घोटाळा उघडकीस ; तुमचे खाते तर नाही बँकेत?

बँकिंग क्षेत्राला हादरवून सोडणारी धक्कादायक घटना समोर आली आहे. जालन्याच्या बदनापूर शहरातील कॅनरा बँकेत तब्बल 7.31 कोटी रुपयांचा घोटाळा झाल्याचा धक्कादायक प्रकार समोर आला आहे. विशेष म्हणजे, ग्राहकांचे खरे सोने चोरून त्या जागी बनावट सोने ठेवण्याचा संतापजनक प्रकार बँकेच्याच जबाबदार अधिकाऱ्यांनी केल्याचे समोर आले आहे.

त्रैमासिक तपासणीत फुटले बिंग

बँकेच्या नियमानुसार दर तीन महिन्यांनी सोन्याच्या दागिन्यांचे पुनर्मूल्यांकन (Revaluation) केले जाते. या प्रक्रियेदरम्यान काही संशयास्पद बाबी आढळल्याने कसून तपासणी करण्यात आली. तपासात धक्कादायक माहिती समोर आली की, बँकेच्या लॉकरमध्ये असलेले सोन्याचे दागिने हे बनावट आहेत. बँकेचा अधिकृत सुवर्णकार प्रवीण बुऱ्हाडे याने या बनावट सोन्याला ‘खरे’ असल्याचे खोटे प्रमाणपत्र दिले आणि या लुटीला साथ दिली.

ज्यांच्या हाती बँकेची चावी असते, त्यांनीच डल्ला मारल्याचे पोलिसांनी सांगितले. याप्रकरणी बदनापूर पोलिसांनी बँक मॅनेजर आणि सुवर्णकार प्रवीण बुऱ्हाडे यांना तातडीने अटक केली आहे. या त्रिकुटातील एक अधिकारी अजूनही फरार असून पोलीस त्याचा शोध घेत आहेत. या घोटाळ्याचे धागेदोरे मोठे असण्याची शक्यता असून अजून काही कर्मचारी पोलिसांच्या रडारवर आहेत.

कॅनरा बँकेसारख्या मोठ्या बँकेत असा घोटाळा झाल्याने बदनापूरसह जिल्हाभरातील ठेवीदारांमध्ये भीतीचे वातावरण आहे. “बँकेतही पैसे आणि सोनं सुरक्षित नसेल तर दाद कोणाकडे मागायची?” असा सवाल आता सामान्य नागरिक विचारत आहेत. आरबीआयच्या संभाव्य कारवाईच्या भीतीने खातेदारांची चिंता अधिकच वाढली आहे.