नवी दिल्ली : दिल्लीच्या राजकीय वर्तुळात आज एका अत्यंत धक्कादायक घडामोडीने खळबळ उडाली आहे. आम आदमी पक्षाचे संस्थापक सदस्य आणि राज्यसभा खासदार राघव चड्ढा यांच्यासह संदीप पाठक आणि अशोक मित्तल यांनी पक्षाला रामराम ठोकत भारतीय जनता पक्षात जाण्याचा निर्णय घेतला आहे. या घडामोडीमुळे केजरीवाल यांच्या नेतृत्वाखालील पक्षाला मोठा राजकीय धक्का बसल्याचे मानले जात आहे.
संदीप पाठक आणि अशोक मित्तल यांच्यासोबत पत्रकार परिषदेत बोलताना राघव चड्ढा यांनी सांगितले की, राज्यसभेतील आम आदमी पक्षाच्या दोन-तृतीयांश सदस्यांनी भारताच्या संविधानातील तरतुदींचा वापर करून भारतीय जनता पक्षात विलीन होण्याचा निर्णय घेतला आहे. त्यांनी हा निर्णय देशहित आणि विकासाच्या दृष्टीने घेतल्याचेही स्पष्ट केले. या राजकीय घडामोडींमुळे राष्ट्रीय राजकारणात मोठी खळबळ उडाली असून, आगामी निवडणुकांच्या पार्श्वभूमीवर याचे दूरगामी परिणाम होण्याची शक्यता व्यक्त केली जात आहे.
दरम्यान, राघव चड्ढा यांनी आम आदमी पक्षाच्या सध्याच्या स्वरूपावर अत्यंत बोचरी टीका केली आहे. “जुना ‘आप’ आता राहिला नाही,” असे म्हणत त्यांनी पक्षाला ‘भ्रष्ट आणि तडजोड करणारा’ गट संबोधले आहे. आम आदमी पक्षाच्या राष्ट्रीय महत्त्वाकांक्षेचा आणि धोरणांचा मुख्य चेहरा मानले जाणारे चड्ढा आता भाजपमध्ये प्रवेश करणार असल्याने संसदेच्या वरिष्ठ सभागृहातील गणिते पूर्णपणे बदलणार आहेत. या फुटीमुळे राज्यसभेत भाजपचे संख्याबळ आणि प्रभाव वाढणार असून, एका महत्त्वाच्या विरोधी पक्षाच्या अस्तित्वावरच प्रश्नचिन्ह निर्माण झाले आहे.
Discussion about this post