चाळीसगाव । चाळीसगाव शहर आणि परिसरात कायदा व सुव्यवस्था अधिक मजबूत करण्यासाठी आणि गुन्हेगारी प्रवृत्तींना वेसण घालण्यासाठी पोलीस प्रशासनाने आक्रमक पाऊल उचलले आहे. आज दिनांक २४ जून रोजी पहाटे २:०० ते ४:०० वाजेच्या दरम्यान चाळीसगाव शहर पोलीस हद्दीत एक भव्य ‘कोम्बिंग ऑपरेशन’ राबवण्यात आले. या मोहिमेमुळे शहरातील छुप्या गुन्हेगारांचे धाबे दणाणले असून, पोलिसांनी एकाच वेळी अनेक ठिकाणी छापे टाकून मोठी कारवाई केली आहे.
या विशेष मोहिमेदरम्यान पोलिसांनी रात्रीच्या अंधारात रेकॉर्डवरील तब्बल ८० अट्टल आरोपी आणि गुन्हेगारांची एकाच वेळी झाडाझडती सुरू केली. संशयितांच्या घरांची प्रत्यक्ष झडती (हाऊस सर्च) घेण्यात आली. या अचानक झालेल्या कारवाईमुळे गुन्हेगारांना पळून जाण्याची संधीच मिळाली नाही. तपासणी करण्यात आलेल्या ८० पैकी ४४ सराईत गुन्हेगारांना पोलिसांनी तात्काळ ताब्यात घेऊन पुढील चौकशीसाठी पोलीस ठाण्यात आणले आहे.
मोहीमेदरम्यान शस्त्र बाळगल्याप्रकरणी आर्म ॲक्ट अंतर्गत दोन गुन्हे नोंदविण्यात आले. तसेच मुंबई पोलीस अधिनियमांतर्गत तीन वाहनांवर कारवाई करण्यात आली. यात एका ऑडीसह तीन वाहनांचा समावेश असून त्यांची एकूण किंमत सुमारे ३९ लाख रुपये असल्याचे पोलिसांनी सांगितले.
याशिवाय न्यायालयीन प्रक्रियेशी संबंधित आठ पकड वॉरंटची अंमलबजावणी करण्यात आली. अवैध मद्यनिर्मिती आणि विक्रीविरोधात प्रोहिबिशन कायद्यांतर्गत तीन गुन्हे दाखल करण्यात आले असून संबंधित साहित्य आणि कच्चे रसायन नष्ट करण्यात आले. तसेच तीन व्यक्तींना समन्स बजावण्यात आले.
पोलीस प्रशासनाच्या या कारवाईमुळे गुन्हेगारी प्रवृत्तीच्या व्यक्तींमध्ये धाक निर्माण झाला असून शहरातील कायदा व सुव्यवस्था अधिक बळकट करण्यासाठी अशा मोहिमा नियमितपणे राबविण्यात येणार असल्याचे सूत्रांनी सांगितले. ही मोहीम वरिष्ठ पोलीस अधिकाऱ्यांच्या मार्गदर्शनाखाली पार पडली. कारवाईत पोलीस अधिकारी, कर्मचारी, स्थानिक गुन्हे शाखेची पथके आणि विशेष पथकांचा मोठ्या प्रमाणात सहभाग होता.
Discussion about this post