जळगाव । देशाच्या अंतर्गत सुरक्षेचा कणा असलेल्या केंद्रीय राखीव पोलीस दलात (CRPF) करियर करण्याची सुवर्णसंधी उपलब्ध झाली आहे. सीआरपीएफ अंतर्गत ९,१९५ रिक्त पदांसाठी मोठी भरती जाहीर करण्यात आली असून, किमान दहावी उत्तीर्ण उमेदवारांकडून अर्ज मागविण्यात आले आहेत. या मेगा भरतीमुळे तरुणांमध्ये उत्साहाचे वातावरण आहे.
कॉन्स्टेबल (तांत्रिक व ट्रेड्समन) या पदांअंतर्गत ही भरती प्रक्रिया राबविण्यात येत आहे. यामध्ये ड्रायव्हर, मोटार मेकॅनिक, कुक, वॉटर कॅरिअर, वेल्डर, सुतार, शिंपी, न्हावी, धोबी तसेच सफाई कर्मचारी अशा विविध पदांचा समावेश आहे. विविध कौशल्य असलेल्या उमेदवारांसाठी ही भरतीची मोठी संधी उपलब्ध झाली आहे.
अर्ज प्रक्रिया पूर्णपणे ऑनलाइन पद्धतीने सुरू झाली असून २० एप्रिलपासून अर्ज सादर करण्यास सुरुवात झाली आहे. अर्ज करण्याची अंतिम तारीख १९ मे निश्चित करण्यात आली आहे. उमेदवारांनी rect.crpf.gov.in या अधिकृत संकेतस्थळावर जाऊन नोंदणी करून अर्ज भरावा.
उपलब्ध पदांपैकी ९,०९६ पदे पुरुष उमेदवारांसाठी, ७९ पदे महिला उमेदवारांसाठी तर २० पदे पायनियर विंगसाठी राखीव ठेवण्यात आली आहेत. महिला उमेदवारांसाठी या भरतीत मर्यादित प्रमाणात संधी देण्यात आली आहे. पात्रतेनुसार उमेदवार किमान दहावी उत्तीर्ण असणे आवश्यक आहे.
काही तांत्रिक पदांसाठी संबंधित ट्रेडमधील औद्योगिक प्रशिक्षण संस्थेचे (आयटीआय) प्रमाणपत्र किंवा अनुभवाची अट लागू शकते. चालक पदासाठी २१ ते २७ वर्षे तसेच इतर पदांसाठी वयोमर्यादा १८ ते २३ वर्षे ठेवण्यात आली असून अनुसूचित जाती, जमाती, इतर मागासवर्गीय तसेच इतर राखीव प्रवर्गातील उमेदवारांना शासनाच्या नियमांनुसार वयोमर्यादेत सवलत देण्यात येणार आहे.
Discussion about this post