जळगाव । शहरातील शनिपेठ पोलीस ठाण्यात सलग घडलेल्या घटनांमुळे अखेर पोलीस प्रशासनाने कठोर भूमिका घेत मोठे बदल केले आहेत. लाच स्वीकारताना रंगेहाथ अटक झालेल्या पोलीस नाईक विनोद अहिरे याच्यावर तात्काळ बडतर्फीची कारवाई करण्यात आली आहे. त्याचबरोबर पोलीस निरीक्षक कावेरी कमलाकर यांची नियंत्रण कक्षात बदली करण्यात आली असून ठाण्याच्या कामकाजातही बदल करण्यात आले आहेत.
अलीकडेच ठाण्याच्या हद्दीत दोन गटांतील वादातून हाणामारीची घटना घडली होती. त्यानंतर लाचखोरीच्या प्रकरणाने प्रकरण अधिकच चिघळले. विनोद अहिरे याने एका प्रकरणात २ लाख रुपयांची मागणी करत १ लाख रुपयांची लाच स्वीकारताना सापळ्यात अडकला. या घटनेमुळे पोलीस विभागाची प्रतिमा धुळीस मिळाल्याची चर्चा रंगली होती.
या सर्व घडामोडींनंतर पोलीस अधीक्षक डॉ. महेश्वर रेड्डी यांनी तत्काळ हस्तक्षेप करत संबंधितांवर शिस्तभंगाची कारवाई केली. तसेच शनिपेठ पोलीस ठाण्याचा कार्यभार सहाय्यक पोलीस निरीक्षक साजीद मन्सुरी यांच्याकडे सोपविण्यात आला आहे.
दरम्यान, जिल्ह्यातील कायदा व सुव्यवस्था अधिक सक्षम करण्यासाठी सर्व पोलीस अधिकाऱ्यांची विशेष आढावा बैठक घेण्यात आली. या बैठकीत निष्काळजीपणा सहन केला जाणार नसल्याचा स्पष्ट इशारा देण्यात आल्याची माहिती समोर आली आहे.
या कारवाईमुळे पोलीस दलात शिस्तीचा संदेश गेला असून भविष्यात अशा प्रकारांवर कठोर कारवाई केली जाईल, असे संकेत प्रशासनाकडून देण्यात आले आहेत.
Discussion about this post