अमरावती ! नाशिकमधील खरात प्रकरण ताजे असतानाच आता अमरावती जिल्ह्यातून एक अत्यंत संतापजनक आणि धक्कादायक प्रकार उघडकीस आला आहे. मुलींना प्रेमाच्या जाळ्यात ओढून, त्यांचे अश्लील व्हिडिओ बनवून ते सोशल मीडियावर व्हायरल करणाऱ्या मोहम्मद अयाज मोहम्मद तनवीर या नराधमाला पोलिसांनी बेड्या ठोकल्या आहेत.
नेमकं प्रकरण काय?
परतवाडा शहरातील रहिवासी असलेल्या मोहम्मद अयाजने अनेक तरुणींना प्रेमाच्या जाळ्यात ओढले. त्यानंतर त्यांचे लैंगिक शोषण करून त्याचे व्हिडिओ स्वतःच चित्रित केले. हे व्हिडिओ वापरून तो तरुणींना ब्लॅकमेल करत होता. धक्कादायक बाब म्हणजे, या नराधमाने जवळपास २०० मुलींचे शोषण केल्याची प्राथमिक माहिती समोर आली असून, या प्रकरणाने संपूर्ण राज्य हादरून गेले आहे.
राजकीय संबंध आणि अटकेची कारवाई
आरोपी मोहम्मद अयाज हा MIM (एआयएमआयएम) या राजकीय पक्षाचा पदाधिकारी आहे. गेल्या तीन दिवसांपासून त्याचे तरुणींसोबतचे व्हिडिओ फेसबुक, इन्स्टाग्राम आणि व्हॉट्सॲपवर व्हायरल होत होते. या व्हिडिओंमध्ये पीडित तरुणींची असहायता स्पष्टपणे दिसत आहे.
दरम्यान, या प्रकरणाच्या पार्श्वभूमीवर भाजपचे खासदार अनिल बोंडे यांनी जिल्हा पोलीस अधीक्षक विशाल आनंद यांची भेट घेऊन तातडीने विशेष तपास पथक (SIT) स्थापन करण्याची मागणी केली होती. तसेच संध्याकाळपर्यंत आरोपीला अटक न केल्यास पोलीस आयुक्त कार्यालयासमोर आंदोलनाचा इशाराही दिला होता. खासदारांच्या इशाऱ्यानंतर पोलिसांनी तत्काळ कारवाई करत आरोपीला अटक केली आहे. सध्या पोलिसांकडून या प्रकरणाचा सखोल तपास सुरू असून आणखी पीडित समोर येण्याची शक्यता व्यक्त केली जात आहे.
Discussion about this post